Read Biblia SEPT Salmos 41 Bible Online

Salmos 41 - Biblia SEPT bible

Salmos 41

¹Do mestre do coro. Salmo de David.

²Feliz quen coida do coitado: no día da calamidade librarao o Señor.

³O Señor gardarao, conservaralle a vida, farao feliz sobre a terra e non o entregará ó capricho do inimigo.

⁴O Señor socorrerao no leito da dor, aliviarao na súa enfermidade.

⁵Eu digo: —"Señor, ten compaixón de min, sándame, que teño pecado contra ti".

⁶Os meus inimigos agóiranme o peor: —"A ver se morre e se perde o seu nome".

⁷Se algún me vén ver, finxe, garda nos adentros cousas de malicia, para pregoalas ó saír.

⁸Os meus inimigos xúntanse para murmuraren de min, e apóñenme o mal que padezo:

⁹—"Unha peste maligna caeu sobre el; deitouse para non se erguer nunca máis".

¹⁰Mesmo o amigo en quen confiaba, que comía do meu pan, levanta o seu pé contra min.

¹¹Pero ti, Señor, ten compaixón de min e ponme en pé, para que poida pagarlles.

¹²Nisto saberei que teño o teu favor: que o meu inimigo non cante vitoria sobre min.

¹³Se eu estou san, é que ti me sostés e mantesme sempre diante de ti.

¹⁴Bendito sexa o Señor, Deus de Israel, desde sempre e para sempre. Amén. Amén.