Read Biblia SEPT Salmos 44 Bible Online

Salmos 44 - Biblia SEPT bible

Salmos 44

¹Do mestre do coro. Poema dos coreítas.

²Nós mesmos, Deus, oímolo, e nosos pais nolo contaron: a obra que fixeches nos seus días, nas idades remotas.

³Coa túa propia man desherdaches xente, para establecelos, destruíches nacións, para estendelos.

⁴Non adquiriron o país coa súa espada, nin foi o seu brazo quen lles deu a vitoria, senón a túa dereita e o teu brazo e a luz da túa presenza, porque os amabas.

⁵Es ti, meu Deus e meu rei, quen lle dá a vitoria a Xacob.

⁶Contigo rexeitamos os nosos agresores, no teu nome calcamos nos nosos adversarios.

⁷Non é no meu arco en quen confío nin é a miña espada a que me dá a vitoria.

⁸Ti es quen nos libra dos que nos aldraxan, quen confundes os que nos odian.

⁹En Deus está a nosa gloria, no seu nome, a nosa gabanza.

¹⁰Mais agora rexéitasnos, exposnos á vergonza, non saes cos nosos exércitos á guerra.

¹¹Déixasnos recuar diante dos inimigos, espóliannos os nosos agresores.

¹²Entrégasnos, coma res de matadoiro, espállasnos entre todas as xentes.

¹³Vendes sen prezo ó teu pobo, sen gañar na súa venda.

¹⁴Fas de nós o riso dos veciños, a burla e o escarnio do arredor.

¹⁵Fas de nós a rexouba das xentes e o aceno burlón dos demais pobos.

¹⁶A deshonra está todo o día ante min, cóbreme a cara a vergonza

¹⁷cando escoito ós que insultan e aldraxan, cando vexo inimigos e adversarios.

¹⁸E todo isto pasounos sen te esquecermos, sen violarmos a túa alianza,

¹⁹sen volver atrás o noso corazón, nin desviar os pés do teu camiño.

²⁰Ti botáchesnos ós chacais, cubríchesnos de tebras.

²¹Se esquecésemos o noso Deus, ou erguésemos as mans a un deus alleo,

²²non o ía Deus descubrir, El, que coñece os íntimos segredos?

²³Pola túa culpa somos decote degolados, tratados coma res de matadoiro.

²⁴Esperta, por que estás, Señor, durmido? Érguete. Non nos rexeites para sempre.

²⁵Por que escondes a túa cara, esqueces a nosa miseria e opresión?

²⁶O noso alento está prostrado no po, o noso ventre polo chan.

²⁷Érguete na nosa axuda, redímenos, pola túa misericordia.