Read Biblia SEPT Salmos 45 Bible Online

Salmos 45 - Biblia SEPT bible

Salmos 45

¹Do mestre do coro, con cítolas de Xuxán. Poema dos coreítas. Cántiga de amor.

²No meu corazón bole unha palabra fermosa: vou recitar unha cántiga para o rei; a miña lingua é lixeira, coma pluma de escribán.

³Ti es o máis fermoso dos nacidos de home, os teus labios deitan a graza; por iso Deus te bendí para sempre.

⁴Cingue, valente, a túa espada, ela é o teu brillo e a túa gloria.

⁵A túa gloria está en loitar pola verdade e pola xustiza; os teus adornos son os escarmentos da túa dereita.

⁶As túas setas son agudas: diante de ti caen os pobos e no medio deles os inimigos do rei.

⁷O teu trono, coma o de Deus, é duradeiro, un cetro de equidade, o teu cetro real.

⁸Ti amas a xustiza e aborreces a iniquidade; por iso Deus te unxiu con óleo de alegrías, entre os teus compañeiros.

⁹A mirra, áloe e acacia recenden os teus vestidos, en pazos de marfil alégrante as arpas.

¹⁰Fillas de reis tes por amigas, e á túa dereita, a raíña, con ouro de Ofir.

¹¹Escoita, filla; olla e atende: esquece o teu pobo e a casa de teu pai.

¹²O rei está engaiolado da túa fermosura: réndete a el, pois el é o teu señor.

¹³Os de Tiro veñen con presentes, os próceres dos pobos buscan o teu favor.

¹⁴Entra con todo o honor dunha princesa, bordados en ouro os seus vestidos;

¹⁵con variado atavío é conducida ó rei, acompañada polas súas doncelas. Preséntante as amigas,

¹⁶condúcente con xúbilo algareiro, introdúcente no pazo do rei.

¹⁷No canto de teus pais terás os teus fillos e poralos por príncipes da terra.

¹⁸Eu farei que por xeracións se recorde o teu nome, e que por séculos te loen as nacións.