Read Biblia SEPT Salmos 5 Bible Online

Salmos 5 - Biblia SEPT bible

Salmos 5

¹Do mestre do coro, con frautas. Salmo de David.

²Escoita, Señor, a miña palabra, atende a miña queixa.

³Oe o balbordo dos meus xemidos, ti, meu rei e meu Deus. A ti dirixo, Señor, a miña súplica,

⁴de mañá escoitarás a miña voz; de mañá presentareiche a miña causa e quedarei agardando.

⁵Ti non es un Deus que queira a maldade: non lles dás hospedaxe ós malvados

⁶nin os soberbios se sosteñen ante ti. Aborreces os malfeitores

⁷e perdes os mentireiros; ós falsos e sanguinolentos abomínaos o Señor.

⁸Mais eu, pola túa moita bondade, podo entrar na túa casa. Prostrareime diante do teu templo, cheo do teu temor.

⁹Guíame, Señor, na túa xustiza; por causa dos meus inimigos, achanza ante min o teu camiño.

¹⁰Na súa boca non hai sinceridade, por dentro están corrompidos. A súa gorxa é sartego aberto e a súa lingua aloumiñeira.

¹¹Castígaos ti, Señor, que fracase o seu proxecto. Abáteos polos seus moitos crimes, pois son rebeldes contra ti.

¹²Alegraranse os que a ti se acollen, terán un xúbilo eterno. Protéxeos ti e alégrense contigo os que aman o teu nome.

¹³Ti, Señor, bendís ós xustos, cóbrelos co teu favor, coma escudo.