Read Biblia SEPT Salmos 50 Bible Online

Salmos 50 - Biblia SEPT bible

Salmos 50

¹Salmo dos asafitas. Fala o Señor, o Deus dos deuses, convoca a terra desde oriente a occidente.

²Desde a fermosa Sión Deus resplandece,

³o noso Deus vén e non cala. Diante del un lume que abura, arredor del a tempestade que brúa.

⁴Desde o alto convoca o ceo e mais a terra para xulgar o seu pobo.

⁵—"Congregade ante min os meus fieis, que cun sacrificio fixeron comigo alianza".

⁶Os ceos anunciarán a súa xustiza, pois é Deus mesmo quen xulga.

⁷—"Escoita, meu pobo, que che falo, Israel, que vou declarar contra ti. Eu son Deus, o teu Deus.

⁸Non te reprendo polos teus sacrificios, pois os teus holocaustos están sempre ante min.

⁹Eu non aceptarei becerros do teu gando nin carneiros dos teus rabaños,

¹⁰pois miñas son as feras todas dos bosques e nos meus montes hai animais a milleiros,

¹¹coñezo os paxaros do ceo, e teño á man canto bole nos campos.

¹²Se tivese fame, non cho iría dicir, pois meu é o mundo e canto o enche.

¹³Acaso como eu carne de touros e bebo sangue de carneiros?

¹⁴Ofrécelle a Deus a loanza e cumpre os teus votos ó Altísimo.

¹⁵Invócame no tempo do apuro: eu salvareite e ti darasme gloria".

¹⁶Dille Deus ó impío: —"Para que recitas os meus mandatos e levas na boca a miña alianza,

¹⁷ti que desprezas a instrución e te viras de costas contra os meus preceptos?

¹⁸Cando ves un ladrón, corres con el e entre os adúlteros atopas o teu sitio.

¹⁹Ábres a boca para o mal e a túa lingua trama o engano.

²⁰A penas sentas, falas do irmán e tíraslle a sona á filla da túa nai.

²¹Cando isto fas, terei eu que calar? Pensas que son coma ti? Repréndote e acúsote á cara".

²²Entendede ben isto, os que esquecedes a Deus, antes que vos esnaquice, sen que ninguén vos salve.

²³O que ofrece loanza dáme gloria; ó que vai por bo camiño dareille a salvación de Deus.