Read Biblia SEPT Salmos 55 Bible Online

Salmos 55 - Biblia SEPT bible

Salmos 55

¹Do mestre do coro, con instrumentos de corda. Poema de David.

²Escoita, Deus, a miña oración, non te escondas da miña súplica.

³Aténdeme, respóndeme, que me abalan as coitas.

⁴Contúrbame a ameaza do inimigo, o barullo dos malvados. Botan calamidades sobre min, afróntanme con asaño.

⁵O corazón retórceseme dentro, asáltanme medos de morte;

⁶éntranme terrores e tremores e cóbreme o espanto.

⁷Penso: —"Quen me dese ás de pomba para voar e pousar!

⁸Fuxiría moi lonxe, faría pousada no deserto.

⁹Atoparía axiña agarimo do furacán e da treboada".

¹⁰Confunde, Señor, baralla as súas linguas, pois vexo na cidade violencia e discordia:

¹¹día e noite xiran ó redor das súas murallas. Dentro dela están o crime e a intriga;

¹²no seu seo, a calamidade; das súas prazas non se afastan a opresión e o engano.

¹³Se fose meu inimigo o que me aldraxa, eu sabería aturalo; se fose meu adversario o que me oprime, eu agacharíame del.

¹⁴Mais es ti, un do meu igual, meu amigo e compañeiro,

¹⁵con quen tiven doce intimidade, con quen fun de festa á casa de Deus.

¹⁶Que a morte os sorprenda, que caian vivos no abismo, xa que dentro deles mora a maldade.

¹⁷Eu invoco ó meu Deus, e o Señor hame salvar.

¹⁸A tarde, á mañá e ó mediodía, quéixome suspirando, e el hame escoitar.

¹⁹Sacarame con ben da loita, aínda que sexan moitos contra min.

²⁰Deus escoitará e humillaraos, El, que goberna desde sempre, pois nin hai neles emenda nin teñen temor de Deus.

²¹Erguen a man contra os amigos e violan os pactos.

²²Falan coa suavidade da manteiga, pero pensan na guerra; as súas palabras soan moles coma aceite, pero son coitelos afiados.

²³Encomenda ó Señor a túa sorte, que El te sosterá: El non deixa nunca que o xusto abanee.

²⁴Ti, Deus, botaralos no pozo da perdición. Os criminais e os traidores non mediarán os días da súa vida; pero eu confío en ti, Señor.