Read Biblia SEPT Salmos 57 Bible Online

Salmos 57 - Biblia SEPT bible

Salmos 57

¹Do mestre do coro, segundo "Non destrúas". Poema de David. Na caverna, fuxindo de Xaúl

²Apiádate, Deus, apiádate de min, pois en ti busco agarimo; busco agarimo á sombra das túas ás, namentres pasa a aflición.

³Eu invoco ó Deus Altísimo, o Deus que cumpre comigo.

⁴Desde o ceo mandarame a salvación, confundirá ós que me oprimen, mandará o seu amor e a súa verdade.

⁵Teño que morar entre leóns, que devoran ós homes. Os seus dentes son lanzas e frechas, as súas linguas coitelos afiados.

⁶Érguete, Deus, sobre o ceo, enche a terra da túa gloria.

⁷Tenden redes ó meu paso, para abater a miña vida; abren unha cova diante de min, e nela caerán eles mesmos.

⁸O meu corazón, Deus, está firme, o meu corazón está firme: quero cantar e tocar salmos.

⁹Espertade, miñas entrañas, espertade, arpa e cítola: quero espertar coa aurora.

¹⁰Heite loar, Señor, diante dos pobos, cantareiche entre as nacións.

¹¹O teu amor alcanza ata o ceo, a túa fidelidade, ata as nubes.

¹²Érguete, Deus, por riba do ceo, enche a terra da túa gloria.