Read Biblia SEPT Salmos 59 Bible Online

Salmos 59 - Biblia SEPT bible

Salmos 59

¹Do mestre do coro. Poema de David. Cando Xaúl mandou cercar a casa para matalo.

²Líbrame, Deus, dos meus inimigos, deféndeme dos que se erguen contra min;

³líbrame dos malfeitores, sálvame dos sanguinarios.

⁴Olla como me axexan e traman contra min os poderosos;

⁵sen que haxa en min, Señor, pecado nin delito, sen maldade en min, axítanse, baldoan. Esperta, ven e ve.

⁶Ti, Señor, Deus dos exércitos, Deus de Israel, esperta, castiga as xentes, non te apiades dos traidores.

⁷Veñen ó escurecer, ladrando coma cans, roldando pola cidade.

⁸Olla como fachendean, son coitelos os seus labios: —"Hai alguén que escoite?".

⁹Mais ti, Señor, búrlaste deles, mófaste de todos os xentís.

¹⁰Cara a ti, miña forza, estou atento, pois Deus é o meu castelo.

¹¹O Deus que me ama adiántase e móstrame os meus inimigos en desfeita.

¹²Non lles darás ti morte, para que o meu pobo non me esqueza? Dispérsaos, abáteos co teu poder, Señor o noso escudo.

¹³As palabras dos seus labios son delito na súa boca. Que se vexan atrapados na súa mesma soberbia, nas mentiras e nas maldicións que eles botan.

¹⁴Consúmeos con noxo, consúmeos, que non existan. Saberase que Deus domina en Israel, e ata os confíns da terra.

¹⁵Veñen ó escurecer, ladrando coma cans, roldando pola cidade.

¹⁶Xiran buscando que comer, ouvean ata fartarse.

¹⁷Eu festexarei o teu poder, cantarei de mañá o teu amor. Ti es o meu refuxio, o meu agarimo, na hora do apuro.

¹⁸Cantareiche a ti, miña forza: Deus é o meu agarimo, o Deus do meu amor.