Read Biblia SEPT Salmos 62 Bible Online

Salmos 62 - Biblia SEPT bible

Salmos 62

¹Do mestre do coro, segundo Iedutún. Salmo de David.

²Soamente en Deus acouga a miña alma, del vén a miña salvación.

³El é a miña rocha, o meu acorro, o meu castelo. Xamais eu non caerei.

⁴Por canto tempo atacaredes contra un, para, entre todos, o abater, coma muro en ruína, coma parede esborrallada?

⁵Só pensan en tiralo do seu posto, fólganse coa mentira: coa súa boca bendín, co seu corazón maldín.

⁶Soamente en Deus acouga, alma miña: El é a miña esperanza.

⁷El é a miña rocha, o meu acorro, o meu castelo. Xamais eu non caerei.

⁸Deus é a miña salvación e a miña gloria; el é a miña rocha, o meu castelo.

⁹Pobo seu, afiúza sempre nel, desafoga diante del o corazón. Deus é o noso agarimo.

¹⁰Só un sopro son os homes, unha aparencia os humanos. Postos na balanza, soben máis leves ca un sopro, todos xuntos.

¹¹Non confiedes no froito da opresión, non vos precedes do roubado. Se crecedes en riqueza, non poñades nela o corazón.

¹²Unha cousa dixo Deus, estas dúas cousas oín: que en Deus está o poder

¹³e en ti, Señor, o amor. Abofé, ti pagarás a cada un de acordo cos seus feitos.