Read Biblia SEPT Salmos 65 Bible Online

Salmos 65 - Biblia SEPT bible

Salmos 65

¹Do mestre do coro. Salmo de David, cántiga.

²Deus, a ti débeseche loar en Sión, a ti cúmprenseche os votos.

³A ti que escoitas a oración, todos os homes se achegan.

⁴Os nosos pecados oprímennos, pero ti perdoas as culpas.

⁵Feliz o que ti elixes e acolles para morar nos teus adros. Fartarémonos cos bens da túa casa e coas ofrendas sagradas do teu templo.

⁶Ti fasnos xustiza con prodixios, Deus, o noso salvador, esperanza dos confíns da terra e das praias remotas.

⁷Ti afincas os montes con forza, cinguido do teu poder.

⁸Ti amainas o rebumbio do mar, o estrondo das ondas, e o tumulto dos pobos.

⁹Os que habitan nos extremos do mundo tremen diante dos teus sinais. Ti alegras as saídas da mañá e da tarde.

¹⁰Ti coidas e regas a terra, enriquécela de mil maneiras: os ríos de Deus van cheos de auga. Para dar o trigo preparas a terra:

¹¹regas os sucos, achanzas os terróns, fala amolecer coas chuvias e bendís as súas sementes.

¹²Ti coroas a anada cos teus bens, das túas pisadas zumega abundancia.

¹³Destilan os pastos do deserto e vístense de alborozo os outeiros.

¹⁴Cóbrense de rabaños os campíos e vístense de espigas os vales, cheos de ecos e de cantos.