Read Biblia SEPT Salmos 69 Bible Online

Salmos 69 - Biblia SEPT bible

Salmos 69

¹Do mestre do coro, con cítolas de Xuxán. De David.

²Sálvame, Deus, que me chegan as augas ó pescozo;

³que me estou afogando nunha lama profunda, sen poder facer pé; que me estou mergullando no abismo das augas, envolto polas correntes.

⁴Estou esgotado de berrar, a miña gorxa está rouca; os meus ollos anúbranse agardando ó meu Deus.

⁵Son máis cós meus cabelos os que me aborrecen sen razón, máis duros cós meus ósos os que inxustamente me perseguen; debo devolver o que nunca roubei.

⁶Ti, Deus, coñeces a miña ignorancia, os meus delitos non se che esconden.

⁷Que en min non se defrauden os que esperan en ti, Señor, Señor dos exércitos; non se avergoncen por min os que te buscan, Deus de Israel.

⁸Por ti aturo eu afrontas e cóbreme a cara a vergonza.

⁹Volvinme estraño para meus irmáns, alleo ós fillos da miña nai.

¹⁰Consómeme o celo da túa casa e as aldraxes dos que te aldraxan caen enriba de min.

¹¹Se me aflixo co xaxún, fan escarnio de min;

¹²se me visto de saco, vólvome o conto de todos:

¹³sentados á porta murmuran contra min e sácanme coplas, mentres beben.

¹⁴Mais eu, Señor, suplico cara a ti, na hora, meu Deus, do teu favor. Pola túa moita bondade, respóndeme, pois ti es o socorro verdadeiro.

¹⁵Sácame da lama e que non afogue, líbrame dos que me aborrecen e das augas sen fondo.

¹⁶Non me envolvan as correntes, non me engula o remuíño e non peche o pozo a boca sobre min.

¹⁷Respóndeme, Señor, conforme ó teu amor, pola túa misericordia, vólvete a min.

¹⁸Non escondas a túa cara ó teu servo; estou no apuro; respóndeme axiña;

¹⁹Achégate a min, rescátame, líbrame dos meus inimigos.

²⁰Ti coñeces a miña afronta, a miña aldraxe, o meu oprobio; á túa vista están os que me asoballan.

²¹A afronta québrame o corazón, e desfalezo, agardo compaixón, e non a hai; quen me console, e non o atopo.

²²Na comida bótanme fel e para a sede danme vinagre.

²³Que se lles converta en lazo a súa mesa e os seus banquetes nunha trampa;

²⁴que se lles anubren os ollos e non vexan e que lles treman os lombos.

²⁵Verte a túa ira sobre eles, e que o teu noxo os atrape.

²⁶Que os seus campamentos sexan arrasados e que non haxa habitantes nas súas tendas.

²⁷Xa que abouxan a quen ti feriches e contan as chagas da túa vítima,

²⁸engádelles culpas sobre culpas e non teñan acceso á túa xustificación.

²⁹Sexan borrados do libro dos vivos e non sexan inscritos entre os xustos.

³⁰Mais a min, pobre e doente, érgueme, Deus, co teu socorro.

³¹Loarei a Deus con cantos, gabareino con acción de grazas.

³²Praceralle ó Señor máis ca un touro, ca un xovenco de cornos e de unllas.

³³Olládeo, humildes, e alegrádevos, avivecede o corazón os que buscades o Señor,

³⁴pois o Señor escoita ós humildes, non despreza ós seus na cadea.

³⁵Lóente o ceo e mais a terra.

³⁶Abofé, salvará Deus a Sión: recomporá as vilas de Xudá, haberá quen as herde e as habite.

³⁷Herdaranas os fillos dos seus servos, habitaranas os que aman o seu nome.