Read Biblia SEPT Salmos 7 Bible Online

Salmos 7 - Biblia SEPT bible

Salmos 7

¹Lamentación, de David. Cando lle cantou ó Señor, polo de Cux o benxaminita.

²Señor, meu Deus, en ti acóllome; líbrame dos meus perseguidores, sálvame,

³non me atrapen coma leóns: esnaquizan e non hai quen se salve.

⁴Señor, meu Deus, se fixen isto, se nas miñas mans hai maldade,

⁵se lle correspondín mal ó amigo, deixando escapar o inxusto opresor,

⁶que o inimigo me persiga e me aprese, que me esmague vivo contra o chan e bote por terra o meu honor.

⁷Érguete, Señor, na túa ira, imponte á rabia do opresor, sae por min, ti que chamas a xuízo.

⁸Que te rodee a asemblea das nacións, e ti pon o asento enriba dela.

⁹O Señor xulga os pobos: xúlgame, Señor, conforme á miña xustiza, ten en conta a miña inocencia.

¹⁰Que se acabe a maldade dos impíos, e confirma ós inocentes, ti, que sondas o corazón e as entrañas, ti, que es o Deus xusto.

¹¹Deus é o meu escudo, el salva ós que son rectos.

¹²Deus é un xuíz xusto, un Deus que ameaza cada día.

¹³Se non se converten, afía a espada, tensa o arco e apunta;

¹⁴prepara armas de morte, tira frechas acesas.

¹⁵Quen concibe a maldade está preñado de malicia e dá a luz o engano.

¹⁶Cava unha cova e afóndaa, e cae el mesmo na cova que fixo.

¹⁷A súa maldade recae na súa cabeza, sobre a propia testa volva a súa violencia.

¹⁸Loarei ó Señor pola súa xustiza, cantarei o nome do Altísimo.