Read Biblia SEPT Salmos 71 Bible Online

Salmos 71 - Biblia SEPT bible

Salmos 71

¹En ti, Señor, acóllome, que endexamais non me vexa confundido.

²Pola túa xustiza, líbrame, deféndeme, inclina o teu oído e sálvame.

³Se ti a rocha do meu refuxio sempre disposta para salvarme: Ti que es a miña forte cidadela.

⁴Rescátame, meu Deus, do poder dos malvados, do puño do criminal e do opresor.

⁵Ti es, Señor, a miña esperanza, a miña confianza, Señor, desde a mocidade.

⁶Desde o nacemento apóiome en ti, desde o seo materno ti es o meu amparo, a ti vai sempre o meu loor.

⁷Para moitos convertinme en escarmento, mais ti es para min forte refuxio.

⁸Da túa loanza está chea a miña boca, e da túa glorificación, o día enteiro.

⁹Non me rexeites na vellez, non me abandones cando me faltan as forzas,

¹⁰pois dirían de min os inimigos, murmurarían os que me axexan:

¹¹—"Deus teno abandonado: perseguídeo, agarrádeo, pois non hai quen o salve".

¹²Non te afastes, Deus, de min, date présa en axudarme.

¹³Que se vexan confusos e abatidos os que atentan contra min; que se cubran de vergonza e confusión os que buscan o meu mal.

¹⁴Eu sigo sempre esperando, engadindo loanza á túa loanza.

¹⁵A miña boca pregoa a túa xustiza, a túa salvación, o día enteiro. Aínda sen as poder contar,

¹⁶falarei das fazañas do Señor: de ti, só de ti, cantarei a xustiza.

¹⁷Desde a mocidade ensínasme ti, Deus, e aínda hoxe eu canto os teus prodixios.

¹⁸Agora na vellez e nas canas non me abandones, meu Deus, para lle contar do teu brazo á xeración presente, e do teu poder a todas as vindeiras.

¹⁹A túa xustiza, Deus, chega ás alturas, ti fixeches cousas grandes: quen coma ti, meu Deus?

²⁰Ti fixéchesme probar apuros e aflicións, pero de novo me darás a vida e volverasme erguer dos abismos da terra.

²¹Acrecerás a miña dignidade e outra vez has consolarme.

²²Eu dareiche as grazas coa arpa, meu Deus, pola túa fidelidade; tocarei para ti a cítola, Santo de Israel.

²³Aclamarante con cantos os meus labios e esta vida que ti rescataches.

²⁴A miña lingua cantará decote a túa xustiza, mentres fican avergonzados e confusos os que buscan o meu mal.