Read Biblia SEPT Salmos 72 Bible Online

Salmos 72 - Biblia SEPT bible

Salmos 72

¹De Salomón. Outórgalle, Deus, o teu xuízo ó rei; ó fillo de reis, a túa xustiza.

²Que rexa ó teu pobo rectamente e ós teus pobres con equidade.

³Os montes ofreceranlle prosperidade ó pobo, os outeiros, xustiza.

⁴El dará o dereito ós humildes, socorrerá os indixentes, esmagará os opresores.

⁵Durará canto dure o sol tanto coma a lúa, polas xeracións.

⁶Será coma chuvia no prado, coma trebón que rega os terreos.

⁷Florecerá a xustiza nos seus días, unha prosperidade duradeira como a lúa.

⁸Dominará de mar a mar, desde o gran río ata o cabo da terra.

⁹Diante del caerán os inimigos, lamberán o po os adversarios.

¹⁰Traeranlle dons os reis de Tárxix e das illas, os reis de Saba e de Sebá pagaranlle tributo.

¹¹Postraranse ante el todos os reis da terra, servirano todas as nacións.

¹²El librará ó pobre que suplica, ó aflixido que está sen axuda.

¹³Terá piedade dos febles e indixentes, salvará a vida dos pobres;

¹⁴rescataraos da inxuria e da opresión, pois a súa vida e o seu sangue son preciosos ós seus ollos.

¹⁵Vivirá e traeranlle ouro de Saba, pedirán sempre por el, todo o día o bendicirán.

¹⁶Abundará o trigo nos campos, nos montes ondularán coma no Líbano os froitos, florecerán as vilas coma a herba dos agros.

¹⁷Que o seu nome dure por sempre e a súa sona igual có sol. Que se bendigan nel todos os pobos e que o proclamen ditoso.

¹⁸Bendito sexa o Señor, Deus de Israel, o único que fai marabillas.

¹⁹Bendito sexa por sempre o seu nome glorioso e que a terra se encha da súa gloria. Amén. Amén.

²⁰Fin das oracións de David, fillo de Ixaí.