Read Biblia SEPT Salmos 75 Bible Online

Salmos 75 - Biblia SEPT bible

Salmos 75

¹Do mestre do coro, segundo "Non destrúas". Salmo de Asaf, cántiga.

²Dámosche as grazas, Deus, dámosche as grazas, Invocamos o teu nome e contamos as túas marabillas.

³Cando eu determine a hora, xulgarei con rectitude.

⁴Se treme a terra e quen a habita, eu sosteño as súas columnas.

⁵Eu aviso ós soberbios: —"Non vos oufanedes", e ós malvados: —"Non ergades a testa;

⁶non ergades a testa ás alturas, non faledes con gorxa insolente".

⁷Non vén do nacente nin do poñente, nin do deserto o que ergue;

⁸Deus é quen goberna: el abate a un e exalta a outro.

⁹Na man do Señor hai unha cunca chea de viño velenoso. Dela dá a beber ata as borras, beberán dela todos os malvados.

¹⁰Eu proclamarei por sempre, cantarei ó Deus de Israel.

¹¹El romperá a testa dos malvados, mentres se ergue a cabeza dos xustos.