Read Biblia SEPT Salmos 79 Bible Online

Salmos 79 - Biblia SEPT bible

Salmos 79

¹Salmo de Asaf. As xentes entraron, Deus, na túa herdade, profanaron o teu santo templo, reduciron Xerusalén a unha ruína.

²Botaron os cadáveres dos teus servos por pasto ás aves do ceo; a carne dos teus amigos, ós animais do monte.

³Verteron sangue coma auga arredor de Xerusalén, sen haber quen enterrase.

⁴Convertémonos en escarnio dos veciños, en burla e riso dos que nos rodean.

⁵Por canto aínda, Señor? Será para sempre o teu enfado? Arderá coma o lume o teu noxo?

⁶Descarga a túa ira sobre as xentes que non te recoñecen, sobre os reinos que non invocan o teu nome,

⁷pois devoran a Israel, alagan as súas moradas.

⁸Non nos teñas en conta os pecados dos pais, chegue axiña a túa piedade, que estamos esgotados.

⁹Axúdanos, Deus, Salvador noso, pola gloria do teu nome; líbranos, perdoa as nosas culpas, por mor do teu nome.

¹⁰Por que han de dicir as xentes: —"Onde está o seu Deus?". Que vexamos cos nosos ollos entre as xentes a vinganza do sangue vertido dos teus servos.

¹¹Que chegue ata a ti o pranto dos cativos e que o teu brazo poderoso salve os condenados á morte.

¹²Págalles sete veces ós veciños o oprobio, Señor, con que te aldraxan.

¹³Nós, o teu pobo, ovellas do teu rabaño, cantaremos polas xeracións as túas loanzas.