Read Biblia SEPT Salmos 81 Bible Online

Salmos 81 - Biblia SEPT bible

Salmos 81

¹Do mestre do coro, coa cítola de Gat. De Asaf.

²Cantade a Deus, a nosa forza, aclamade ó Deus de Israel;

³pulsade o salterio, tocade o pandeiro, a donda cítara e a arpa.

⁴Tocade a trompeta na lúa nova, na lúa chea, no día da festa.

⁵Para Israel isto é unha lei, un precepto do Deus de Xacob.

⁶Impúxollo por lei a Xosé, cando saíu da terra de Exipto.

⁷Escoitei a fala dun descoñecido, tireille a carga do lombo, as súas mans deixaron as cestas.

⁸No apuro chamáchesme e libreite, respondinche agachado entre trebóns, púxente a proba nas augas de Meribah.

⁹Oe, meu pobo, que quero avisarte, escóitame ben, Israel.

¹⁰—"Non terás contigo un deus estraño, non adorarás un deus alleo.

¹¹Eu son o Señor, o teu Deus, quen te sacou da terra de Exipto: abre a túa boca, que eu a encherei".

¹²Pero o meu pobo non escoitou a miña voz, Israel non quixo nada de min.

¹³E deixeinos á súa teima, que fixesen ó seu xeito.

¹⁴Ai, se o meu pobo me escoitase, se Israel seguise o meu camiño!

¹⁵Abateríalle nun intre os inimigos, volvería a miña man contra os opresores.

¹⁶Os que aborrecen ó Señor, adularíano, e a súa sorte sería duradeira.

¹⁷Manteríao con flor de trigo, con mel bravo o fartaría.