Read Biblia SEPT Salmos 84 Bible Online

Salmos 84 - Biblia SEPT bible

Salmos 84

¹Do mestre do coro, coa cítola de Gat. Dos coreítas. Salmo

²Que agarimosa é a túa morada, Señor do universo!

³A miña alma ten saudade, consómese polos teus adros; o meu corazón e todo o meu corpo reloucan polo Deus vivo.

⁴Mesmo o paxaro atopa casa, a andoriña un niño onde poñer os filliños, ó pé dos teus altares, Señor dos exércitos, meu rei e meu Deus.

⁵Ditosos os que habitan na túa casa e decote te loan.

⁶Ditosos os que atopan en ti forza e pensan nos teus camiños.

⁷O pasaren polo val árido, trócano en oasis e a chuvia primeira cóbreo de bens.

⁸Atravesan de forte en forte, ata veren a Deus en Sión.

⁹Señor, Deus dos exércitos, oe a miña súplica, escoita, Deus de Israel.

¹⁰Atende, Deus, ó noso rei, mira o rostro do teu Unxido.

¹¹Un día nos teus adros vale por máis de mil: eu prefiro o limiar da casa do meu Deus que habitar na tenda dos malvados.

¹²O Señor é adarga e escudo, o Señor outorga gloria e favor. Non nega ben ningún ós que camiñan na inocencia.

¹³Señor dos exércitos, benia quen en ti confía.