Read Biblia SEPT Salmos 86 Bible Online

Salmos 86 - Biblia SEPT bible

Salmos 86

¹Pregaria, de David. Señor, abaixa o oído e aténdeme, que son pobre e coitado;

²gárdame, que son amigo teu, salva, meu Deus, a este servo que confía en ti.

³Apiádate, Señor, que te estou a chamar o día enteiro;

⁴Alegra o meu espírito que se dirixe a ti.

⁵Ti, Señor, es bo e indulxente, cheo de amor para aqueles que te invocan.

⁶Escoita, Señor, a miña súplica, atende a miña pregaria.

⁷Chámote na hora do apuro, e ti hasme axudar.

⁸Ti, Señor, non tes semellante entre os deuses, non hai feitos coma os teus.

⁹Os pobos todos que fixeches virán, Señor, adorarte, honrar o teu nome.

¹⁰Ti es grande e fas prodixios, ti es o único Deus.

¹¹Ensíname, Señor, os teus camiños, e andarei coa túa verdade; recolle o meu corazón no temor do teu nome.

¹²Eu loareite, Señor, meu Deus, de todo corazón, glorificarei decote o teu nome,

¹³pois o teu amor comigo é moi grande, ti líbrasme do abismo.

¹⁴Os soberbios, meu Deus, érguense contra min, un fato de violentos busca a miña vida, sen repararen en ti.

¹⁵Pero ti, Señor, es Deus compasivo e clemente, tardo á ira, grande en amor e lealdade.

¹⁶Mira para min, apiádate, dálle forzas ó teu servo, salva o fillo da túa serva.

¹⁷Fai de min un sinal da túa bondade, para que vexan e se avergoncen aqueles que me aborrecen, pois ti, Señor, es para min axuda e consolo.