Read Biblia SEPT Salmos 90 Bible Online

Salmos 90 - Biblia SEPT bible

Salmos 90

¹Pregaria de Moisés, home de Deus. Señor, ti fuches o noso agarimo, ó longo das xeracións.

²Primeiro que os montes xurdisen, e que fosen formados a terra e o mundo, desde sempre e por sempre es ti Deus.

³Ti podes volver en po os mortais, con dicirlles:— "Fóra, homes".

⁴Mil anos ante ti son coma o onte que pasou e coma unha vixilia da noite.

⁵Ti falos pasar, e son coma sono de mañanciña, coma herba que agroma:

⁶de mañá florece e verdea e á tarde ségana e seca.

⁷A túa ira fainos desfalecer, a túa cólera tennos desmaiados,

⁸porque pos as nosas culpas ante ti, os nosos segredos á luz da túa ollada.

⁹Os nosos días esvaecen na túa indignación, acabamos coma un suspiro os nosos anos.

¹⁰A nosa vida é de setenta anos, de oitenta a dos máis fortes; e os máis deles son de traballos e miserias: esvaecen de présa, e nós voamos.

¹¹Quen puidese valorar a forza da túa ira, a túa indignación, co debido temor!

¹²Ensínanos a contar os nosos días, para que aprendamos a ser asisados.

¹³Volve, Señor. Por canto aínda? Apiádate dos teus servos.

¹⁴Dános axiña a fartura da túa misericordia, para que a nosa vida teña felicidade e ledicia.

¹⁵Alégranos polos días en que nos aflixiches, por tantos anos de coitas.

¹⁶Que se vexa a túa obra nos teus servos e a túa gloria nos teus fillos.

¹⁷Que a bondade do Señor, noso Deus, sexa connosco e que el asegure as accións das nosas mans.