Read Biblia SEPT Salmos 95 Bible Online

Salmos 95 - Biblia SEPT bible

Salmos 95

¹Vide, cantémoslle ó Señor, aclamemos a nosa rocha salvadora;

²Acheguémonos á súa presenza con loanza, aclamémolo con cancións.

³O Señor é un Deus grande, rei poderoso sobre todos os deuses.

⁴Ten os fundamentos da terra na súa man, perténcenlle os cumes dos montes.

⁵Seus son os mares, que El fixo, os continentes, que formou a súa man.

⁶Vide, adorémolo prostrados, axeonllémonos ante o Señor, que nos creou.

⁷El é o noso Deus e nós somos o seu pobo, o rabaño que guía a súa man. Se escoitásedes hoxe a súa voz!

⁸Non endurezades o corazón, coma en Meribah, coma o día de Masah, no deserto,

⁹cando vosos pais me tentaron, provocáronme aínda que viran os meus feitos.

¹⁰Corenta anos anoxoume aquela xente, e dixen: —"Son un pobo de extraviado corazón, que non recoñece os meus camiños".

¹¹E xurei na miña cólera: —"Non entrarán no meu acougo".