Read Biblia SEPT Salmos 96 Bible Online

Salmos 96 - Biblia SEPT bible

Salmos 96

¹Cantádelle ó Señor un cántico novo, cántalle ó Señor, terra enteira;

²cantade ó Señor e bendicide o seu nome, pregoade todos os días a súa salvación;

³cantade entre as xentes a súa gloria; ante todos os pobos, as súas marabillas.

⁴Grande é o Señor e digno de loanza, máis temible ca todos os deuses.

⁵Os deuses das nacións son aparencia, pero o Señor fixo os ceos.

⁶Na súa presenza, gloria e maxestade; no seu santuario, forza e fermosura.

⁷Tributade ó Señor, pobos todos, tributade ó Señor honor e forza,

⁸tributade ó Señor a gloria do seu nome. Collede ofrendas, entrade nos seus adros,

⁹Adorade o Señor con vestido sagrado, treme na súa presenza a terra enteira.

¹⁰Dicide entre as xentes: —"O Señor reina, asenta o mundo, e non se move, goberna os pobos rectamente".

¹¹Alégrese o ceo, exulte a terra, brúe o mar e canto o enche;

¹²rían os campos e o que hai neles, rebrinquen as árbores do bosque,

¹³diante do Señor que vén, que vén para rexer a terra. El rexerá o mundo con xustiza e os pobos con rectitude.