Read Biblia SEPT Salmos 97 Bible Online

Salmos 97 - Biblia SEPT bible

Salmos 97

¹O Señor reina, alégrese a terra, exulten todas as illas.

²Rodéano nubes e néboa, xustiza e rectitude sosteñen o seu trono.

³Un lume vai diante del e queima os inimigos ó arredor.

⁴Os seus lóstregos aluman os espazos, e, ó velo, estarrécese a terra,

⁵os montes derrétense coma cera, diante do Señor, dono do mundo.

⁶Os ceos pregoan a súa rectitude e todos os pobos contemplan a súa gloria.

⁷Avergónzanse os que adoran imaxes e os que presumen dos seus ídolos: diante del axeónllanse os deuses.

⁸O escoitalo, alégrase Sión, reloucan as vilas de Xudá, polas túas decisións, Señor.

⁹Ti, Señor, es o soberano de toda a terra, no cumio de todos os deuses.

¹⁰O Señor ama a quen aborrece a maldade, garda a vida dos seus amigos, líbraos das mans dos malvados.

¹¹A luz despunta para os xustos e para os rectos a ledicia.

¹²Alegrádevos, xustos, no Señor, loade o seu nome santo.