Read Biblia SEPT Proverbios 10 Bible Online

Proverbios 10 - Biblia SEPT bible

Proverbios 10

¹Proverbios de Salomón. Fillo sabio alegra a seu pai, fillo necio dá mágoa a súa nai.

²Tesouros mal gañados non dan proveito, pero a xustiza libra da morte.

³O Señor non deixa pasar fame á gorxa do xusto mais porá impedimento ó degoiro dos malos.

⁴Man indolente carrexa pobreza, brazo dilixente enriquece.

⁵Quen recolle no verán é asisado, quen dorme durante a colleita é unha desgraza.

⁶As bendicións para a cabeza do xusto, pero a violencia tapa a boca do malvado.

⁷A lembranza do xusto provoca bendicións, mais a sona dos perversos podrece.

⁸Home de mente sabia acolle directrices, o de labios necios bótase a perder.

⁹Quen camiña a dereitas vai seguro, quen vai polas tortas é atrapado.

¹⁰Quen fai que non ve carrexa dor, quen corrixe na cara constrúe a paz.

¹¹Manancial de vida é a boca do xusto, mais o parolar dos perversos encobre violencia.

¹²O odio acende liortas, pero o amor pasa por riba da ofensa.

¹³Nos labios do intelixente atópase a Sabedoría, no lombo do parvo, o fungueiro.

¹⁴Os sabios amorean saber, mais a boca do necio é ruína inminente.

¹⁵A fortuna do rico é o seu castelo ameado, o terror dos pobres é a súa miseria.

¹⁶A paga do xusto é a vida, a ganancia do malvado é o erro.

¹⁷Camiña para a vida quen acepta a instrución, o que refuga a corrección pérdese.

¹⁸É de labios falaces o que acocha xenreiras e quen espalla calumnias é un insensato.

¹⁹Nunha chea de verbas non faltará o erro, o que contén os labios sabe o que fai.

²⁰Lingua de xusto, prata de lei; matinar de perversos, refugallo.

²¹Os labios do xusto pastan a moitos, os parvos morren por falta de siso.

²²É a bendición do Señor a que fai rico e o esforzo non engade nada.

²³Tramar un plano torcido é o xogo do necio, e do home intelixente é a Sabedoría.

²⁴O malvado vénlle enriba o que teme, ós xustos dáselles o que arelan.

²⁵Pasou a galerna, esvaeceu o malvado; mais o xusto é un alicerce perenne.

²⁶Vinagre para os dentes, fume para os ollos; tal é o preguiceiro para quen lle dá un mandado.

²⁷O Temor do Señor acrecenta días, os anos dos malvados abrévianse.

²⁸Leda é a expectación dos xustos, a esperanza dos malvados perecerá.

²⁹Salvagarda do honrado é o poder do Señor, mais é terror para os que fan o mal.

³⁰O xusto non será endexamais abaneado, os malvados non habitarán a terra.

³¹A boca do xusto produce Sabedoría, a lingua mentireira será tallada.

³²Os labios do xusto flúen boa vontade; a boca malvada, dobres intencións.