Read Biblia SEPT Proverbios 11 Bible Online

Proverbios 11 - Biblia SEPT bible

Proverbios 11

¹Balanzas enganosas aborréceas o Señor, o seu gusto son as pesas axustadas.

²Detrás da fachenda chega a vergonza, pero a Sabedoría vai cos modestos.

³A integridade guía ós rectos, a falsidade destrúe ós traidores.

⁴De nada vale a fortuna no día da ira, mais a xustiza salva da morte.

⁵A xustiza dos íntegros enderéitalles o camiño, pola súa maldade vén o malo a caer .

⁶A xustiza dos rectos sálvaos, pola súa cobiza son atrapados os traidores.

⁷Morto o malvado, acabóuselle a esperanza e o seu afiuzar nas riquezas perece.

⁸O xusto líbrase da angustia, o malvado ocupa o seu lugar.

⁹O hipócrita coa boca afunde ó veciño, mais polo seu saber sálvanse os xustos.

¹⁰Polo éxito dos xustos alégrase a vila, e pola perda dos malvados fai festa.

¹¹Coa bendición dos honrados medra a cidade, coa leria dos malvados arruínase.

¹²Quen aldraxa ó veciño non ten siso, o home prudente cala.

¹³Quen anda con contos descobre segredos, home de fiar garda a palabra.

¹⁴Sen boa dirección pérdese un pobo, o progreso está nos moitos expertos.

¹⁵Mal lle irá a quen sae fiador por un estraño, quen refuga eses tratos terá seguridade.

¹⁶A muller xeitosa bótanselle flores, e os arriscados conquistan riqueza.

¹⁷O home piadoso para si mesmo é bo, o cruel a si mesmo se dana.

¹⁸O malvado leva unha paga ilusoria, quen sementa xustiza leva un salario de lei.

¹⁹O que sementa a xustiza ten por destino a vida, quen persegue o mal vai cara á morte.

²⁰Aborrece o Señor os corazóns torcidos, e comprácese nos de conduta honrada.

²¹Abofé que o malvado non quedará impune, a descendencia dos xustos será posta en liberdade.

²²Anel de ouro no fociño dun porco é a muller fermosa pero sen xeito.

²³A arela dos xustos é só o ben a esperanza dos malvados xera ira.

²⁴Hai quen é xeneroso e se fai máis rico; hai quen aforra de máis e vive na miseria.

²⁵Quen crea prosperidade el mesmo medra, e quen abebera será abeberado.

²⁶Toda a bisbarra maldí ó que retén o trigo, e enche de bendicións a quen o vende.

²⁷Quen madruga para facer o ben atrae o favor, mais o mal sae ó encontro de quen o busca.

²⁸Quen afiúza na súa riqueza murcharase, pero os xustos agromarán coma follas.

²⁹Quen arruína o casal vai herdar vento, e o parvo chegará a escravo do sabio.

³⁰O froito dun home recto é a árbore da vida, e o sabio atrae as persoas.

³¹Se o xusto recibe na terra o seu debido, moito máis o perverso e o pecador.