Read Biblia SEPT Proverbios 12 Bible Online

Proverbios 12 - Biblia SEPT bible

Proverbios 12

¹O que ama a instrución ama o saber, mais o que odia a corrección é estúpido.

²O bo acada o favor do Señor, pero El condena ó retorto.

³O home non se ten en pé sobre a maldade, mais a raiceira dos xustos non se conmove.

⁴A muller mañosa é a coroa do seu home, a desvergonzada é carie nos ósos.

⁵Teima dos xustos é a equidade; matinación dos malvados, o engano.

⁶As verbas dos perversos son emboscadas criminais, o falar dos rectos fainos ceibes.

⁷Os malvados son abatidos e desaparecen, pero o casal dos xustos mantense.

⁸Loan a un polo seu siso, mais o arteiro será aldraxado.

⁹Mellor lle vai a un home modesto que teña de que vivir, do que ó fachendoso que non ten pan.

¹⁰O de bo natural atende á fame do gando, mais os sentimentos do malvado son crueis.

¹¹Quen traballa a súa terra fartarase de pan, o que anda ás nugallas é parvo.

¹²O alicerce dos malvados é derrubado, mais o raigaño dos xustos mantense.

¹³Enguedéllase o malo no exceso dos seus labios, pero o xusto foxe da estreitura.

¹⁴Pode un home encherse co froito do que fala, e ser recompensado polo que faga coas mans.

¹⁵O parvo parécelle recta a súa conduta, mais soamente é sabio quen escoita un consello.

¹⁶A carraxe do parvo axiña se mostra, mais o astuto disimula unha inxuria.

¹⁷O home veraz conta a verdade; a testemuña falsa, a mentira.

¹⁸Persoas hai que falan a estocadas, a fala dos sabios é medicina.

¹⁹Falar sincero dura para sempre; fala embusteira, tan só un intre.

²⁰O engano é a intención dos que argallan o mal, mais a ledicia é a paga dos que aconsellan a paz.

²¹Ningún mal caerá sobre o xusto, mais os malvados fican cheos de coitas.

²²Aborrece o Señor os labios mentireiros, comprácese, en troques, nos que practican a verdade.

²³O home astuto esconde o seu saber, os parvos pregoan as súas tolemias.

²⁴Man dilixente, ó goberno; man nugallá, a servir.

²⁵A ansiedade no corazón do home angústiao, a verba agarimosa alégrao.

²⁶O home de ben móstralle a vía ó amigo, o camiño dos perversos extravía.

²⁷O preguiceiro non asa o que cazou, mentres o dilixente amorea riquezas.

²⁸No vieiro da xustiza atópase a vida, o camiño da necidade leva á morte.