Read Biblia SEPT Proverbios 13 Bible Online

Proverbios 13 - Biblia SEPT bible

Proverbios 13

¹O fillo asisado acolle a disciplina paterna, o petulante non dá escoita á reprensión.

²Un home pode xantar abondo do froito do seu falar, mais o degoiro dos traidores é a violencia.

³Quen garda a boca garda a vida, o laretas busca a súa ruína.

⁴Moito arrela o nugallán, mais en van; en troques, a arela dos dilixentes vese cumprida.

⁵Odia o xusto as verbas mentireiras, o malvado deshónrase e deshonra.

⁶A xustiza garda ó home sen chata, a desgraza bota abaixo ó pecador.

⁷Hai quen se fai o rico e non ten nada, e quen pasa por pobre e reborda de bens.

⁸Algúns coa riqueza rescatan a vida, o pobre non teme as ameazas.

⁹A luz dos xustos refulxe, a candea dos malvados esmorece.

¹⁰O testalán fai xurdir liortas coa súa fachenda, a sabedoría está cos que se aconsellan.

¹¹Riqueza gañada axiña pouco dura, o que a xunta pouco a pouco acrecentaraa.

¹²Esperanza aprazada fai adoecer o corazón, arela cumprida é unha árbore de vida.

¹³Quen despreza o mandato arruínase, a quen respecta a norma iralle ben.

¹⁴O ensino do sabio é fonte de vida que afasta das trapelas da morte.

¹⁵O bo senso gaña favores, as maneiras dos falsos son a súa perda.

¹⁶O astuto todo o fai con siso, o parvo espalla necidade.

¹⁷O mensaxeiro malvado fai caer en desgraza, o mensaxeiro fiel leva curación.

¹⁸Pobreza e vergonza para o que desbota a instrución, mais quen escoita a crítica acadará honra.

¹⁹Desexo satisfeito, dozura para o espírito; para os necios é un horror apartarse do mal.

²⁰Vai onda os sabios: volverás sabio; quen fai compaña ós necios, terá que sufrir.

²¹A desfeita persegue ós pecadores, os bos son premiados con felicidade.

²²A herdanza do home bo chega ata os netos, o pecador xunta a fortuna para o xusto.

²³Agra de ricos dá moita mantenza, mais pérdese por falta de xustiza.

²⁴O que aforra vara, odia ó seu fillo; quen lle ten boa lei dáse présa en corrixilo.

²⁵O xusto xanta a boca chea, o bandullo dos perversos fica baleira.