Read Biblia SEPT Proverbios 18 Bible Online

Proverbios 18 - Biblia SEPT bible

Proverbios 18

¹O que anda apartado procúrase manías e disente de calquera plano.

²O necio non se comprace na prudencia, senón tan só nas súas matinacións.

³Onde chega a maldade, chega o desprezo; coa mala sona chega a aldraxe.

⁴Augas profundas son as palabras dun home, canle burbullante, fonte de Sabedoría.

⁵Inicuo é favorecer o culpable, e prexudicar o inocente co veredicto.

⁶Labios de necio levan a preito, a súa boca chama á liorta.

⁷A boca do necio é a súa propia ruína, e os seus labios son para el mesmo unha trampa.

⁸Verbas de intrigante son coma lambetadas, que penetran no máis fondo do ventre.

⁹O neglixente no seu traballo é irmán do destrutor.

¹⁰O nome do Señor é forte torre: acóllese nel o xusto, e acouga seguro.

¹¹A facenda do rico é o seu castelo fortificado, considéraa coma unha alta muralla.

¹²O corazón do home érguese orgulloso antes da desfeita, pero é a humildade a que precede á gloria.

¹³Quen responde unha cuestión antes de escoitar, conseguirá fatuidade e mais vergonza.

¹⁴Animo baril sostén no sufrimento, pero quen soerguerá un ánimo decaído?

¹⁵Mente prudente acada o saber, oído de sabios procura a ciencia.

¹⁶Regalos abren camiños, e levan a ter tratos cos grandes.

¹⁷O primeiro en falar nun preito semella levar razón, ata que chega o outro e fai a réplica.

¹⁸A sorte apaga as contendas, e decide entre os potentes.

¹⁹Irmán ofendido péchase máis ca unha fortaleza, e as liortas son ferrollos de castelo.

²⁰Do froito da súa boca énchese o ventre do home, e fártase co produto dos seus labios.

²¹Morte e vida están no poder da lingua; dos froitos que prefira, xantará.

²²Quen encontra muller encontra un ben, e recibiu favor do Señor.

²³O pobre fala xemendo, o rico responde bruando.

²⁴Hai compañeiros só para parolar, e hai amigos máis íntimos ca irmáns.