Read Biblia SEPT Proverbios 19 Bible Online

Proverbios 19 - Biblia SEPT bible

Proverbios 19

¹Mellor é pobre de recto proceder, ca rico de falar retorcido.

²Vitalidade sen siso non vale ren, pés inquedos dan no erro.

³A necesidade do home tórceo na súa conduta, e con todo o seu ánimo irrítase contra o Señor.

⁴A fortuna amorea amigos, mais o pobre é abandonado polo propio veciño.

⁵Falsa testemuña non ficará impune, nin fuxirá o perxuro da xustiza.

⁶Cortexan moitos o favor do nobre, todos son amigos para o que fai agasallos.

⁷Odian ó pobre todos os seus irmáns; moito máis se apartarán del os veciños! Está aínda a falar, e xa fuxiron.

⁸Quen adquire bo siso, ámase a si mesmo; quen garda prudencia, atopará a felicidade.

⁹Testemuña falsa non ficará impune, e o perxuro perecerá.

¹⁰Non cadra co necio a boa vida, e menos aínda que un escravo goberne nos príncipes.

¹¹O home sabio móstrase tolerante, a súa gloria é deixar de lado a ofensa.

¹²Bruar de león é a xenreira do rei, mais coma orballo na herba é o seu favor.

¹³Fillo insensato, estrago para o seu pai; muller enredante, goteira constante.

¹⁴Casal e fundamento hérdanse dos pais, mais a muller competente dáa o Señor.

¹⁵A preguiza leva ó sono, mais o indolente pasará fame.

¹⁶Quen garda o mandamento, garda a vida; quen rexeita a súa autoridade, morrerá.

¹⁷Quen é bo co pobre préstalle ó Señor, que lle reparará cumpridamente a débeda.

¹⁸Corrixe ó teu fillo mentres haxa esperanza, pero non te deixes levar ata matalo.

¹⁹Quen fai alampar a ira, cargue co castigo: se o deixas pasar por alto, anímalo a repetir.

²⁰Escoita o consello e acepta a represión, para que ó remate sexas sabio.

²¹En moitos proxectos matina o home, mais é o plano do Señor o que se impón.

²²O que se demanda dun home é a lealdade, pois máis vale pobre ca falso.

²³O temor do Señor promove a vida: pódese un deitar farto sen ser visitado pola desgraza.

²⁴O preguiceiro mete a man na cunca, e xa non ten azos nin para volvela á boca.

²⁵Malla no burlón, e o inxenuo farase asisado; reprende ó asisado, e acrecentará o seu saber.

²⁶Quen dá maltrato a seu pai e desbota a súa nai, é un fillo deshonrado e infame.

²⁷Meu fillo, se deixas de atender a corrección, errarás lonxe das palabras prudentes.

²⁸A testemuña perversa búrlase da xustiza, as bocas dos malvados engulipan o crime.

²⁹Para os arrogantes prepáranse fungueiros, e para os lombos dos parvos, zorregadas.