Read Biblia SEPT Proverbios 2 Bible Online

Proverbios 2 - Biblia SEPT bible

Proverbios 2

¹Meu fillo, se te apropias os meus ditos e atesouras os meus mandatos

²dando oído á Sabedoría, inclinando o teu ánimo ó discernimento;

³certo, se chamas pola intelixencia e reclamas con berros a razón,

⁴se a procuras como farías coa prata e cavas por ela coma por un tesouro,

⁵entenderás entón o temor do Señor e atoparaste co coñecemento de Deus;

⁶pois é o Señor quen dá a Sabedoría, da súa boca chegan a ciencia e a intelixencia;

⁷reserva El a competencia para os honrados, é un escudo para os de conduta sen tacha,

⁸gardando os vieiros da xustiza e coidando o camiño dos seus fieis.

⁹Distinguirás entón o dereito, a xustiza e boa lei: todas as xeiras da felicidade;

¹⁰porque a Sabedoría entrará no teu ánimo e o coñecer dará gusto ó teu padal;

¹¹A discreción velará sobre ti, gardarate o discernimento,

¹²rescatándote do mal camiño dos que falan con retranca,

¹³dos que abandonan os vieiros sinxelos para camiñar por rúas entebrecidas,

¹⁴dos que gozan facendo o mal e se deleitan na perversidade,

¹⁵dos que seguen vieiros tortos e van por camiños extraviados.

¹⁶Preservarate da muller allea, da descoñecida que fala con agarimo

¹⁷que se alongou do compañeiro da súa mocidade e esqueceu a alianza do seu Deus,

¹⁸pois a súa casa inclínase cara á morte, as súas xeiras cara ás sombras dos mortos;

¹⁹quen a ela vai non torna nin acada os vieiros da vida.

²⁰Así poderás marchar polo camiño dos bos e gardar os vieiros dos xustos.

²¹Pois os homes honrados habitarán na terra, os íntegros serán deixados nela,

²²mais os malvados serán desbotados da terra e os traizoeiros extirpados dela.