Read Biblia SEPT Proverbios 21 Bible Online

Proverbios 21 - Biblia SEPT bible

Proverbios 21

¹Coma as canles da auga, a mente do rei está na man do Señor, el víraa para onde quere.

²Todo o proceder do home semella recto ós seus ollos pero é o Señor quen sopesa os motivos.

³Facer o recto e o xusto, prefíreo o Señor ós sacrificios.

⁴Ollar fachendoso e corazón finchado: o facho dos impíos é o pecado.

⁵Os planos do dilixente dan boa renda, pero quen anda ás présas anda ás perdas.

⁶Gañar tesouros con lingua embusteira é sopro que foxe e trampa de morte.

⁷A violencia dos perversos arrástraos, por se teren negado a practicar o xusto.

⁸O proceder do arteiro todo é reviravoltas, mais é recto o facer do home cabal.

⁹Mellor é habitar nun recuncho do faiado, ca con muller enredante en casa grande.

¹⁰O instinto do impío tende ó mal, non repara con piedade no seu próximo.

¹¹Cando o burlón as paga, aprende o inxenuo, mais cando se instrúe a un sabio, el acrecenta seu saber.

¹²O xusto controla o casal do malvado, e precipita ós impíos na ruína.

¹³Quen peche a orella ó laio do pobre, tamén el berrará e non será escoitado.

¹⁴Regalo baixo corda desvía a ira; e suborno no peto, a máis fera xenreira.

¹⁵É ledicia do xusto o facer a xustiza, e unha desgraza para os malfeitores.

¹⁶Quen desvía do vieiro da prudencia, rematará na compaña dos mortos

¹⁷Quen gusta da esmorga, rematará pobre; e quen se afai ó viño e ó perfume, non enriquecerá.

¹⁸O malvado será o rescate do home de ben, e o traidor, o do home recto.

¹⁹Mellor é morar nun ermo ca ter muller fungona e enredante.

²⁰Na morada dun sabio gárdanse tesouros desexables e requintados, namentres que o parvo consúmeo todo.

²¹Quen procura xustiza e lealdade, acada vida e mais honra.

²²O sabio sabe como atacar un castelo de paladíns, e derrubar a fortaleza na que afiuzaban.

²³Quen controla boca e lingua, garda a súa vida de estreituras.

²⁴Leva alcume de petulante o fachendoso insolente, que no actuar se pasa de presuntuoso.

²⁵O degoiro do preguiceiro lévao á morte, pois as súas mans refugan o traballo.

²⁶Cobiza e máis cobiza todo o día! Só o home de ben dá sen reserva.

²⁷Sacrificios de impíos son de aborrecer, e aínda máis cando os fan de mala lei.

²⁸A falsa testemuña desaparece, mais o que sabe escoitar fala para sempre.

²⁹O perverso pon a forza nas aparencias, o recto afianza a súa conduta.

³⁰Non hai Sabedoría, nin discernir, nin plano que valla diante do Señor.

³¹Aparéllase o cabalo para o día da loita, mais a vitoria é cousa do Señor.