Read Biblia SEPT Proverbios 29 Bible Online

Proverbios 29 - Biblia SEPT bible

Proverbios 29

¹Quen endurece despois da reprensión, vai á ruína nun momento, sen remedio.

²Cando mandan os xustos, o pobo alégrase; mais se un impío goberna, o pobo xeme.

³Quen ama a Sabedoría alegra a seu pai, quen frecuenta prostitutas malgasta a facenda.

⁴Un rei fai próspero o país coa xustiza, mais quen aumenta os impostos arruínao.

⁵O que lle di verbas suaves ó veciño, téndelle unha rede diante dos pés.

⁶Na maldade do impío escóndese un lazo, namentres que o xusto reloucará ledo.

⁷Recoñece o xusto o dereito dos pobres, mais o malvado non ten comprensión.

⁸Homes arrogantes turban unha cidade, mais os sabios aquedan a ira.

⁹Cando un sabio ten preito cun necio, enfádase ou ri, pero non ten sosego.

¹⁰Os sanguinarios odian ó íntegro, pero os rectos considéranse del.

¹¹O parvo déixase levar de calquera impulso, mais o sabio reprímeo e acálmao.

¹²Cando un gobernante dá creto a razóns falsas, todos os seus ministros serán malvados.

¹³Pobre e explotador teñen algo en común: O Señor deulles ós dous a luz dos ollos.

¹⁴Rei que xulga equitativamente os pobres, o seu trono afíncase para sempre.

¹⁵A vara e a reprensión dan sabedoría, rapaz consentido avergonza a súa nai.

¹⁶Cando mandan malvados acrecéntase o crime, pero os xustos ollarán a súa desfeita.

¹⁷Corrixe ó teu fillo: servirache de acougo e dará satisfaccións ó teu espírito.

¹⁸Onde non hai revelación, o pobo perde o freo; mais benia o que respecta a lei!

¹⁹Só con razóns non se corrixe un criado, pois aínda que comprenda non obedece.

²⁰Viches un que fala a toda présa? Máis se pode esperar dun tolo que non del.

²¹O que consente ó seu criado desde pequeno, ó remate sairalle respondón.

²²Home alporizado alampa liortas, o acalorado multiplica as faltas.

²³O orgullo do home humillarao, quen ten ánimo humilde acadará honra.

²⁴Quen ten parte co ladrón odia a súa vida, pois escoita a maldición e non denuncia.

²⁵O respecto humano tende un lazo, mais quen afiúza no Señor ponse a salvo.

²⁶Moitos procuran o favor do gobernante, mais é do Señor de quen se obtén xustiza.

²⁷É abominable para os xustos o home inicuo, é aborrecible para o malvado o de conduta recta.