Read Biblia SEPT Proverbios 3 Bible Online

Proverbios 3 - Biblia SEPT bible

Proverbios 3

¹Filliño, non esquezas o meu ensino e garda no ánimo os meus mandatos

²pois hante acrecentar longura de días, anos de vida e prosperidade;

³que non te abandone a lealdade constante, cínguea arredor de túa gorxa, escríbea na táboa do teu corazón.

⁴Acadarás aceptación e boa sona á vista de Deus e mais dos homes.

⁵Confía no Señor con todo o teu ser e non te apoies na propia intuición;

⁶teno en conta en todos os teus camiños e El achanzará os teus vieiros.

⁷Non te teñas por sabio, teme ó Señor e arreda do mal;

⁸Ese será un tónico para a túa saúde e un remedio para os teus ósos.

⁹Honra ó Señor cos teus bens, coa primicia de todo canto gañes;

¹⁰encheranse os teus cabazos de gran e as túas pipas estouparán de mosto.

¹¹Filliño, non rexeites a instrución do Señor, non leves a mal a súa corrección,

¹²pois o Señor reprende a quen ama e aflixe ó fillo benquerido.

¹³Ditoso o home que dá coa Sabedoría e o que vén dotado de discernimento,

¹⁴pois adquirila é de máis proveito cá prata e de máis ganancia có ouro;

¹⁵é de máis prezo có coral, non se lle compara canto poidas desexar.

¹⁶Na súa dereita leva unha vida longa, na esquerda, a riqueza e a honra.

¹⁷Os seus camiños son deliciosos, os seus vieiros, cheos de paz;

¹⁸é a árbore da vida para os que a aferran, os que a reteñen son felices.

¹⁹O Señor fundou a terra por medio da Sabedoría, afirmou o ceo co discernimento;

²⁰polo seu saber burbullan as fontes abismais e as nubes destilan o orballo.

²¹Meu fillo, non as perdas de vista: pon garda á competencia e á habilidade.

²²Serán vida para a túa gorxa, beleza no teu pescozo.

²³Irás entón seguro no teu camiño sen tropezar co pé.

²⁴O te ires deitar, non pasarás medo; unha vez deitado, será doce o teu sono.

²⁵Non che fará tremer un espanto súbito nin a destrución que cae sobre os malvados,

²⁶pois o Señor estará ó teu carón e gardará da trampa o teu pé.

²⁷Non lle negues un favor a quen ten dereito a el, cando está no teu poder o concedelo.

²⁸Non lle digas ó teu veciño: —"Vai e volta outra vez, mañá eu che darei", se tes con que.

²⁹Non amañes un mal contra o teu próximo cando el vive confiado á túa beira.

³⁰Non lle poñas preito a ninguén sen motivo, cando non che fixo prexuízo ningún.

³¹Non envexes o violento nin adoptes os seus procedementos,

³²pois o Señor aborrece ó perverso, e reserva a súa intimidade para os honrados.

³³A maldición do Señor cae sobre o casal do impío, pero bendí a morada dos xustos.

³⁴Cos burlóns, búrlase deles, mais demostra o seu favor ós humildes;

³⁵Os sabios herdan a honra, os parvos gañan a vergonza.