Read Biblia SEPT Proverbios 5 Bible Online

Proverbios 5 - Biblia SEPT bible

Proverbios 5

¹Meu fillo, atende á miña Sabedoría dá oído ó meu discernimento;

²dese xeito poderás gardar confidencias e os teus labios conservarán saber.

³Os labios de muller allea pingan mel e o seu padal esvara máis có aceite;

⁴pero ó remate amarga máis có áloe, é máis tallante ca unha espada de dous fíos;

⁵os seus pés van descendendo para a morte, as súas pegadas van dar no Xeol;

⁶non ten ela en conta o camiño da vida, os seus vieiros cambian, nunca ten sosego.

⁷Polo tanto, filliño, escóitame, non te afastes das miñas razóns;

⁸Arreda dela o teu camiño, non te achegues á porta da súa casa;

⁹non sexa que deixes para outros o teu honor e os teus anos a un ser cruel;

¹⁰non sexa que aproveiten os alleos o teu vigor e as túas fatigas na casa da estranxeira,

¹¹que entón te laiarías ó virche enriba a fin, ó se che consumiren o corpo e mais as carnes;

¹²dirías daquela: "Malia de min, que aborrecín a instrución e o meu corazón desprezou a corrección!

¹³Non quixen escoitar a voz dos meus mestres e non prestei oído ós meus ensinantes;

¹⁴pouco faltou para me ver totalmente arruinado diante da asemblea e do consello".

¹⁵Bebe a auga da túa cisterna, e as burbulladas do teu pozo.

¹⁶Ias derramar pola rúa os teus regatos polas prazas as túas canles?

¹⁷Que sexan para ti só non para as compartires cos estraños!

¹⁸Que sexa bendita a túa fonte e goces coa compañeira da túa mocidade,

¹⁹cerva amada, gacela xeitosa! Que os seus peitos te teñan sempre bébedo e decote te envolva o seu amor!

²⁰Por que, meu fillo, irte axuntar coa allea? Por que abrazar o seo dunha estranxeira?

²¹Que Deus ten diante dos ollos o proceder dos homes, enxerga todos os seus vieiros;

²²As propias culpas cazan ó malvado, enrédase nas cordas do seu pecado

²³e morre pola súa indisciplina; será amortallado na súa necidade.