Read Biblia SEPT Proverbios 9 Bible Online

Proverbios 9 - Biblia SEPT bible

Proverbios 9

¹A Sabedoría construíu a súa casa tallou as súas sete columnas,

²fixo a matanza do gando, mesturou o seu viño, e preparou a súa mesa;

³despachou as súas criadas a anunciar o convite polos altos da cidade:

⁴—"Quen sexa inxenuo, que se achegue aquí"; ó que carece de siso dille:

⁵—"Vide, comede do meu pan e bebede do viño que mesturei,

⁶deixade a vosa inxenuidade e viviredes, camiñade pola vía da intelixencia".

⁷Quen corrixe ó burlón, carga el coa aldraxe; quen reprende ó impío, é el a deshonrarse.

⁸Non corrixas ó insolente, non sexa que te odie; corrixe a un sabio, e hate amar.

⁹Dálle instrución ó sabio: tornarase máis sabio; informa ó xusto, e acrecentará a súa doutrina.

¹⁰O comezo da Sabedoría é o Temor do Señor, e o coñecemento do Santo é intelixencia.

¹¹Polo meu medio multiplicaranse os teus días, hánsete acrecentar os anos da vida;

¹²se te fas sabio, será para o teu proveito, se te fas burlón, serás ti só a sufrilo.

¹³Dona Tolemia é turbulenta, inxenua, non sabe ren.

¹⁴Séntase á porta da casa nunha cadeira no alto da vila,

¹⁵para chamar polos paseantes, polos que van dereitos polo seu camiño:

¹⁶—"Quen sexa inxenuo, que se achegue aquí". E ó que carece de siso, dille:

¹⁷—"Doces son as augas roubadas e o pan prohibido é máis gustoso".

¹⁸E o tal non sabe que alí fican os mortos e os seus convidados, nos vales do Xeol.