Read Biblia SEPT Qohélet (Eclesiastés) 10 Bible Online

Qohélet (Eclesiastés) 10 - Biblia SEPT bible

Qohélet (Eclesiastés) 10

¹"Unha mosca morta fai feder un perfume de marca", e un pouco de Tolemia custa máis caro có saber e a gloria.

²"Se o Sabio dirixe a mente para a dereita o Tolo faino para a esquerda".

³Por onde queira que camiñe o Parvo, fáltalle siso: vai proclamando a todo o mundo que está tolo.

⁴Se a xenreira do que manda se dirixe contra ti, non deixes o teu posto, xa que: "A mansedume sanda grandes erros".

⁵Vin que hai un mal baixo o sol, unha especie de falta que ten orixe no soberano:

⁶Un inepto posto en altos cargos, mentres que os aptos e capaces sentan por debaixo.

⁷Vin servos de a cabalo e principais camiñando coma servos pola terra.

⁸"O que cava unha foxa, pode caer nela e quen derruba un muro pode ser mordido pola cobra".

⁹"Quen pica pedras pódese ferir con elas, quen parte leña pódese mancar con ela".

¹⁰"Cando o ferro se embota (por non lle afiar o gume), cómpre facer máis forza", mais é unha vantaxe empregar ben a habilidade.

¹¹"Cando a serpe pica antes do esconxuro, de nada vale o esconxurador".

¹²"As verbas da boca do Sabio son axeitadas, os labios do Tolo son os que o perden";

¹³o seu exordio xa é unha parvada e a súa peroración, un fatal desvarío,

¹⁴e conste que o Tolo fala abondo. Con todo, o home non sabe o que vai suceder, e quen lle contará o que virá despois del?

¹⁵Cando por fin ficará canso o Tolo no seu esforzo se nin sequera dá co camiño para a vila?

¹⁶Ai de ti, terra onde o rei é un monifate, e onde os ministros amencen entre enchedelas!

¹⁷Benia ti, terra na que o rei é un notable, e onde os ministros xantan ás súas horas!, barís, non bébedos.

¹⁸"Por neglixencias afúndense as trabes do teito, por mans nugallás pinga toda a casa".

¹⁹Para folgar fanse os banquetes, e o viño aleda a vida, e o diñeiro concede todo.

²⁰Non renegues do rei nin en pensamento! Non fales mal do rico nin na alcoba! Pois ata os paxaros do ceo lle irán co conto, e mesmo os seres alados rexouban.