Read Biblia SEPT Qohélet (Eclesiastés) 8 Bible Online

Qohélet (Eclesiastés) 8 - Biblia SEPT bible

Qohélet (Eclesiastés) 8

¹Quen é coma o Sabio? Quen é capaz de interpretar un feito? "A Sabedoría dun home bríllalle no rostro, e trócalle a dureza da face".

²Ti cumpre a orde do rei e non te precipites no tocante ó xuramento a Deus.

³Sae da súa presenza, non quedes, se estás nunha mala situación, pois pode facer todo canto quere.

⁴Porque: "A palabra do rei é poderosa e quen lle vai dicir: Que fas ti alí?".

⁵"Quen cumpre co mandado, non sufrirá nada malo" e: "Do momento oportuno e do xuízo, sabe o corazón sabio".

⁶Xa que todo asunto ten o seu tempo e a súa razón, e sobre o home penden moitos males;

⁷non coñece o que lle pode acaecer, e quen o vai informar do que está por vir?

⁸Non hai home que poida controlar o espírito, como non hai control do día da morte, nin evasión da loita, nin riqueza que deixe libre ó seu dono.

⁹Todo isto considerei prestando atención a canto se fai baixo o sol durante o tempo en que un home domina sobre outro para mal.

¹⁰Deste modo vin eu levar para a cova ós impíos. E vaise con eles, e vóltase do camposanto. E esquécese na vila o que fixeron. Tampouco isto non ten xeito!

¹¹E se a sentencia por un mal proceder non se executa de seguido, os homes collen folgos para facer o mal;

¹²con todo, aínda que é verdade que o pecador que fai o mal cen veces, é tolerado, ben sei eu aquilo de: "Os que temen a Deus terán a felicidade xustamente por temelo";

¹³e tamén: "Non lle irá ben ó impío; igual cá sombra non prolongará os seus días, porque non teme a Deus".

¹⁴Aínda hai outra cousa absurda na terra: Xustos ós que lles vai coma se obrasen coma impíos; impíos ós que lles vai coma se fixesen igual cós xustos. Eu penso que tamén isto é un absurdo.

¹⁵Eu aprobo a ledicia, pois non hai cousa mellor para o home baixo o sol que comer e beber e gozarse. Isto é o que o acompaña no seu esforzo os días de vida que Deus lle dea baixo o sol.

¹⁶Apliqueime a coñecer a Sabedoría e a considerar o traballo que se realiza na terra: nin de noite nin de día albisca o home o sono cos seus ollos.

¹⁷E observei todo o facer de Deus: o home non consegue descubrir a propósito do que se fai baixo o sol; e por máis que o home se esgote en procuralo, non o atopa; e aínda que o Sabio coida que o sabe, non pode dar con el.