Read Biblia SEPT Cantares 1 Bible Online

Cantares 1 - Biblia SEPT bible

Cantares 1

¹O mellor dos Cantares, de Salomón.

²—Que me bique cun bico da súa boca! Abofé, mellores son có viño os teus amores,

³mellores có recendo dos teus perfumes; coma esencia que esvara é o teu nome, ben é que te amen tanto as raparigas.

⁴Arrástrame contigo: Corramos! Introdúzame o Rei na súa alcoba. Folguémonos en ti, ledas abondo, Loemos os teus amores máis có viño. Que ben fan en te amaren!

⁵Morena eu son pero xeitosa —meniñas de Xerusalén— coma as tendas de Quedar, coma as cortinas de Xalmah.

⁶Non reparedes en que son moreniña: foi que o sol me queimou. Fillos de miña nai anoxáronse comigo, puxéronme de garda nas súas viñas, e a miña, a miña viña, non a gardei.

⁷Dime ti, meu ben amado, onde apacentas? Onde fas repousar o gando ó mediodía? Para que hei andar sen rumbo onda os rabaños dos teus amigos?

⁸—Non o sabes ti, belida entre as mulleres? Vai tralas pegadas das ovellas! Pasta os teus cabuxos onda as cabanas dos pastores!

⁹A unha egua de carros faraónicos compárote eu, miña amada.

¹⁰Que ben feitas as meixelas entre os pendentes, e a gorxa entre os colares!

¹¹Farémosche colgantes de ouro puro, coas doas prateadas!

¹²—Mentres o Rei se deita no diván, ponse o meu nardo a recender.

¹³Folequiño de mirra é para min o meu amigo, repousa entre os meus peitos;

¹⁴coma acio de fiafeira é para min o meu amigo, das viñas de En-Guedí.

¹⁵—Si que es belida, miña amada, si que es belida! Os teus ollos son pombiñas!

¹⁶—Si que es ti belido, meu amigo, e ben garrido! Frondoso é o noso leito,

¹⁷de cedro ten as trabes a nosa casa, de ciprés son os teitos.