Read Biblia SEPT Cantares 5 Bible Online

Cantares 5 - Biblia SEPT bible

Cantares 5

¹—Xa veño para o meu horto, cariño, miña noiva; collín xa a miña mirra e o meu bálsamo, comín xa do meu panal o do meu mel, bebín xa do meu viño e do meu leite. Comede, pois, amigos, e bebede ata embebedarvos de agarimos!

²—Estaba eu a durmir, pero o meu corazón en vela, cando chama petando o meu amigo. —"Ábreme, meu cariño, miña amada, miña pomba, todo o meu ben! Porque teño a cabeza toda enchoupada de orballo, de pingotiñas da noite os meus rizos".

³—"Espinme xa da túnica, heime vestir de novo? Lavei xa os meus pés, habíaos de lixar?"

⁴Pasou o meu amigo a man polo poxigo e en min tremeron as entrañas.

⁵Erguinme para lle abrir ó meu amigo, pois fuxíame a alma ó seu falar; as miñas mans destilaban coma mirra, os meus dedos eran mirra refinada sobre o pasador da pechadura.

⁶Abrinlle ó meu amigo, pero o meu amigo partira, xa pasara. Busqueino e non o atopei; chameino e non respondeu.

⁷Atopáronme os gardas que roldan a vila; batéronme e feríronme; arrincáronme o dengue os gardas das murallas.

⁸Conxúrovos, meniñas de Xerusalén se é que atopades o meu amigo, que lle habedes dicir, se non que doente vou de amor?

⁹—"Que caste de amigo é o teu, belida entre as mulleres? Que caste de amigo é o teu para así nos conxurares?".

¹⁰—"É o meu amigo esplendoroso e louro, escolleito entre milleiros.

¹¹A súa cabeza é de pan de ouro fino, son acios de palmeira os seus cabelos e mouros coma o corvo.

¹²Ten ollos coma pombas das fontes dos regatos, que bañadas no leite repousan á beira dun estanque.

¹³As súas meixelas son matas de bálsamo onde medran as especias; os seus labios son lirios a destilar mirra fina.

¹⁴As súas mans, torques de ouro engastados con xoias de Tárxix; o seu ventre, unha placa de marfil salpicada con zafiros.

¹⁵Son as súas pernas dous esteos de mármore afincados sobre baseamentos de ouro. Ten o aspecto do Líbano e é lanzal coma os cedros,

¹⁶e o seu bicar, tan doce. Todo el é de arelar! Tal é o meu amigo, tal o meu compañeiro, meniñas de Xerusalén.