Read Biblia SEPT Cantares 6 Bible Online

Cantares 6 - Biblia SEPT bible

Cantares 6

¹—Para onde foi o teu amigo, belida entre as mulleres? Cara a onde volveu o teu amigo e contigo o iremos buscar?

²—Baixou o meu amigo ó seu horto, vai nas matas do bálsamo; foi pastar no xardín e facer a colleita de lirios.

³Eu son do meu amigo e o meu amigo é meu, que pasta nos lirios.

⁴—Fermosa es ti, miña amada, coma Tirsah, xentil coma Xerusalén, terrible cal batallón, pendóns ó vento.

⁵Torna os ollos de min que me fan arrepiar! Os teus cabelos son fato de cabuxas que baixan serpeando do Galaad.

⁶Os teus dentes, grea de ovellas nais subindo do lavado, todas elas preñadas de xemelgos, e ningunha hai maniña.

⁷Rebandas de granada son as túas meixelas por entre o teu veo.

⁸Se son sesenta as raíñas, oitenta as favoritas e sen conta as doncelas,

⁹só unha é a miña pomba, a máis perfecta, a única de súa nai, preferida daquela que a xerou. Vírona as donceliñas, e gabárona, as raíñas e favoritas, e loárona.

¹⁰—"Quen é esta que está a xurdir coma a alborada, fermosa coma a lúa chea, a brillar coma o sol, terrible cal batallón, pendóns ó vento?

¹¹Ao nogueiral baixei ver xermolar as palmas, ollar se agroma a vide e florecen os granados.

¹²Non sei o que me pasa pois que me puxo a tremer ela, a filla de xentes nobres.