Read Biblia SEPT Sabedoría 1 Bible Online

Sabedoría 1 - Biblia SEPT bible

Sabedoría 1

¹Amade a xustiza os que gobernades o país, tede do Señor un bo concepto e procurádeo cun corazón sinxelo,

²que se deixa El atopar polos que non o tentan e revélase ós que del non desconfían.

³Argumentos revirados son os que afastan de Deus mais o seu poder, posto a proba, acusa ós insensatos;

⁴pois non entra a Sabedoría nunha alma retorcida nin mora nun corpo suxeito ó pecado.

⁵O espírito santo foxe da educación ficticia, afinca lonxe das matinacións necias e, sobrevindo a inxustiza, é refugado.

⁶En verdade a Sabedoría é un espírito benévolo co home mais non deixará impune ó blasfemo lareteiro porque Deus é testemuña das súas entrañas, controlador veraz do seu corazón e oidor da súa lingua;

⁷dado que o espírito do Señor enche o mundo e quen mantén unido o universo sabe canto se di.

⁸Por iso quen fala impiamente non poderá ocultarse nin o pasará de longo a Vinganza sen acusalo.

⁹Farase pescuda das matinacións do impío, a sona das súas verbas chegará ata o Señor para acusación dos seus delitos;

¹⁰pois un oído celoso escoita todo, nin sequera se lle oculta o moumeo das murmuracións.

¹¹Gardádevos, logo, da murmuración inútil e preservade a lingua da maledicencia pois o dito máis secreto non se profire en balde e a boca mentireira mata a alma.

¹²Non provoquedes a morte coa vosa vida extraviada nin vos carrexedes a ruína coas obras das vosas mans

¹³porque non fixo Deus a morte nin se aleda co exterminio dos vivos;

¹⁴creouno todo, de certo, para que subsista e as criaturas do mundo son saudables; non hai nelas veleno mortal nin ten o Hades imperio sobre a terra,

¹⁵porque a Xustiza é inmortal.

¹⁶Os impíos, en troques, chámana con xestos e verbas; coidando que é unha amiga, devecen por ela, fan con ela alianza: merecen en efecto ser da súa facción.