Read Biblia SEPT Sabedoría 3 Bible Online

Sabedoría 3 - Biblia SEPT bible

Sabedoría 3

¹Pero as vidas dos xustos están na man de Deus: non haberá tormento que as toque.

²As xentes insensatas coidaban que morreran e o seu tránsito semellaba unha desgraza,

³o seu partir de entre nós, unha desfeita, mais eles fican en paz.

⁴Aínda que para o ollar humano fosen magoados, a súa esperanza ía preñada de inmortalidade;

⁵corrixidos no pouco, acadarán moito pois foi Deus quen os probou e atopounos dignos de si.

⁶Depurounos coma ouro no crisol, aceptounos coma sacrificio de holocausto.

⁷No momento de lles pedir contas resplandecerán, saltarán coma as muxicas dos carozos;

⁸gobernarán países, dominarán nos pobos e sobre eles reinará o Señor eternamente.

⁹Os que nel afiúzan acadarán a verdade, os fieis no amor serviranlle moi cerca, pois concede El o seu piadoso favor ós virtuosos e a protección ós que El elixiu.

¹⁰Mais os impíos sufrirán o castigo conforme ó seu pensar por abandonaren ó xusto e se arredaren do Señor.

¹¹Malpocado o que desbota Sabedoría e Instrución! Baleira é a súa esperanza, inútiles os esforzos, sen xeito as súas obras,

¹²tolas as súas mulleres, retorcidos os seus fillos, maldita a súa caste.

¹³Benia, en troques, a estéril sen chata que non coñece un leito de pecado. Recollerá o seu froito no xuízo das vidas.

¹⁴Do mesmo xeito ó eunuco que non fixo delito coas súas mans nin arelou o mal contra o Señor, daráselle pola súa fidelidade un premio escolleito, e a función máis cobizada no templo do Señor.

¹⁵Pois o froito de traballar polo ben é magnífico e inmortal a raiceira da prudencia.

¹⁶En canto ós fillos dos adúlteros, non acadarán a madurez, e a descendencia dun leito ilexítimo esvaecerá.

¹⁷Por máis que vivan longos anos, non os considerarán nada e, ó remate, a súa vellez será sen sona.

¹⁸Se por caso morren cedo, non terán esperanza nin quen lles dea ánimos no día do proceso,

¹⁹pois é funesta a fin dunha caste inicua.