Read Biblia SEPT Sabedoría 4 Bible Online

Sabedoría 4 - Biblia SEPT bible

Sabedoría 4

¹Mellor é non ter fillos e si virtude, pois a súa lembranza é xa unha inmortalidade recoñecida de Deus e mais dos homes:

²presente, imítana; ausente, arélana; coroada, desfila triunfal na eternidade, vencedora na lide de trofeos sen chata.

³Pola contra, a numerosa plebe dos inicuos non servirá para nada, dos seus gromos bastardos non botará fondos raigaños nin asentará sobre rexo alicerce.

⁴Xa que, por moito que un tempo agromen as súas polas, frouxamente afincada, abaneará co vento, e será arrincada pola forza da galerna;

⁵quebraranse os seus xermolos deformes, o seu froito é inútil, sen sazón para comer e sen proveito ningún.

⁶Pois os fillos nacidos de soños ilexítimos son testemuñas da maldade contra os pais cando verbo deles se faga unha enquisa.

⁷Mais o xusto, aínda morrendo prematuro, gozará de repouso.

⁸A ancianidade venerable non é a lonxevidade nin se mide por número de anos.

⁹Cabeza cana é para os humanos a prudencia e vellez madura unha vida inmaculada.

¹⁰Un fíxose agradable a Deus, e Deus amouno, e como vivía entre os pecadores, foi trasladado;

¹¹foi arrebatado para que a malicia non lle mudase a conciencia nin o engano lle seducise a alma.

¹²Pois o engado vicioso corrompe o que é bo e o impulso da paixón trastorna a mente inxenua.

¹³Madurecido cedo, completou longos anos;

¹⁴A súa alma era aceptable ó Señor, foi por iso axiña tirado do medio da maldade. A xente óllao e non se decata nin presta atención ó feito.

¹⁵Pois El pon o favor e a misericordia nos seus elixidos e a protección nos seus devotos.

¹⁶O xusto morto condena ós impíos que aínda viven, e a mocidade madurecida cedo condena a vellez chea de anos do inxusto.

¹⁷Ollarán, en efecto, o morrer do sabio sen se decataren dos designios de Deus tocante a el nin de para que o Señor o puxo a salvo.

¹⁸Ollarano con menosprezo mais o Señor rirá deles;

¹⁹e ó cabo converteranse nun cadáver infame, obxecto de aldraxe entre os mortos para sempre; pois El vainos guindar mudos cabeza abaixo, acaneará neles desde os alicerces e serán esmagados ata o límite; vivirán na dor e perecerá o seu recordo.

²⁰Achegaranse acovardados a render conta dos seus erros e os seus propios delitos acusaranos na cara.