Read Biblia SEPT Sabedoría 5 Bible Online

Sabedoría 5 - Biblia SEPT bible

Sabedoría 5

¹Erguerase daquela o xusto moi seguro de si diante dos que o asoballaron e desprezaron os seus esforzos;

²ó ollalo tremerán cun medo arrepiante abraiados por unha salvación tan inesperada.

³Dirán para si, arrepentidos, saloucando co ánimo angustiado:

⁴—"Este é aquel que noutrora escarnecemos con cántigas burleiras, nós, os mal asisados; coidabamos que a súa vida era unha tolemia e o seu finar infame.

⁵Como é que o enumeran entre os fillos de Deus e ten parte na herdanza xunto cos santos?

⁶Ata nos afastamos do camiño da verdade e non nos alumaba a luz da xustiza nin para nós alborexaba o sol;

⁷enguedellámonos nas silveiras da impiedade e da perdición, atravesamos desertos impracticables mais non recoñecemos o camiño do Señor.

⁸Que proveito nos trouxo a nosa fachenda? e o gabarnos de ricos de que nos serviu?

⁹Todo aquilo pasou coma unha sombra, coma fugaz noticia,

¹⁰coma a dorna que suca as augas galopantes sen que se atope o rastro do seu vogar nin deixe o ronsel da quilla por entre as ondas;

¹¹ou coma o paxariño que fende o aire voando sen deixar un vestixio da súa viaxe; só o abaneo das ás azouta o aire livián, ráchao coma asubío intenso, abríndose camiño co bulir das ás, mais ó cabo non resta sinal do seu voar;

¹²ou como despois da frecha disparada ó branco, o aire fendido volta a se xuntar de súbito talmente que se lle ignora a traxectoria.

¹³Do mesmo xeito nós, non xa nacemos, esvaecemos sen ter sinal ningún de virtude que amosar, malgastándonos na nosa malicia.

¹⁴Pois a esperanza do impío é coma lixo levado do vento, ou coma folerpa miúda que espalla a galerna, ou coma fume que disipa o vento, e coma a lembranza pasada do hóspede dun día".

¹⁵Mais os xustos viven eternamente, garda o Señor a súa recompensa e o Altísimo mira por eles.

¹⁶Recibirán, con razón, a magnífica coroa e a diadema da beleza da man do Señor, porque os encubrirá coa súa destra e co seu brazo escudaraos;

¹⁷collerá o seu celo coma armadura e armará a creación para a defensa contra ós inimigos;

¹⁸vestirá coma coiraza a xustiza, cinguirá de casco o xuízo sincero,

¹⁹embrazará coma escudo unha santidade invencible,

²⁰Afiará a súa ira inexorable coma unha espada e a seu carón loitará o universo contra os necios;

²¹partirán certeiros os lóstregos disparados, do ben curvado arco das nubes saltarán ata o branco;

²²da funda da súa carraxe xurdirán sarabiadas arreo, cara a eles alporizaranse as augas do mar e os ríos asolagaranos implacables;

²³erguerase contra eles un sopro poderoso e coma unha galerna disiparaos; a iniquidade estragará a terra enteira, e a maldade abaterá os tronos dos podentes.