Read Biblia SEPT Sabedoría 6 Bible Online

Sabedoría 6 - Biblia SEPT bible

Sabedoría 6

¹Escoitade, reis, logo, e sede perspicaces! Aprendede, gobernantes das terras máis remotas!

²Dade oídos, os que dominades a xente e vos gabades de ter multitudes de pobos!

³Do Señor venvos o poder e a soberanía da parte do Altísimo; El examinará as vosas obras e esculcará as vosas intencións,

⁴porque sendo ministros do seu reinado non gobernastes conforme a dereito nin gardastes a lei nin procedestes segundo a vontade de Deus.

⁵Arrepiante e repentino caerá sobre vós, pois faise un xuízo severo de quen está no alto.

⁶Xa que ó pequeno se lle disimula por piedade mais os grandes son xulgados con grande rigor,

⁷porque non se deixa amedrentar o dono do universo nin o impresionan as grandezas, dado que foi El quen fixo a pequenos e grandes e por igual se considera de todos,

⁸mais ós que se cren fortes espéraos unha enquisa rigorosa.

⁹A vós, polo tanto, soberanos, dirixo as miñas verbas para que aprendades Sabedoría e non teñades tropezos,

¹⁰pois só os que santamente observan as cousas santas serán estimados santos e os que se instrúan nelas atoparán defensa.

¹¹Arelade, por tanto, as miñas verbas; anheládeas e seredes instruídos.

¹²Raiolante e perenne é a Sabedoría e enxérgana sen dificultade os que a aman; déixase atopar dos que a procuran.

¹³Adiántase a se dar a coñecer polos que a arelan.

¹⁴Quen madrugue por ela non ha de cansar: atoparaa chantada a carón da súa porta.

¹⁵O matinar nela é xa o cumio da prudencia, quen por ela deixa o sono axiña se verá libre de preocupacións,

¹⁶pois ela de seu vai de acá para alá á procura dos que dela sexan dignos, aparéceselles benigna nos vieiros, sáelles ó encontro en calquera proxecto.

¹⁷O seu comezo máis auténtico é a arela de instrución:

¹⁸xa o degoiro de instrución é amor, e amor é a garda das súas leis; a observancia desas leis é garantía da incorruptibilidade;

¹⁹A incorruptibilidade, pola súa conta, achega a Deus;

²⁰logo a arela da Sabedoría guía cara ó Reino.

²¹De xeito que, se gustades dos tronos e dos cetros, soberanos das nacións, facede aprecio da Sabedoría para que reinedes para sempre.

²²Vouvos contar o que é Sabedoría e como naceu sen vos esconder segredo ningún; pola contra, pescudareina desde a súa orixe deixando ben en claro o seu coñecemento sen me afastar da verdade.

²³Non camiñarei canda a envexa corrosiva pois non ten ela tratos coa Sabedoría.

²⁴Multitude de Sabios é salvación do mundo; e rei ben asisado, prosperidade do pobo.

²⁵Deixádevos, pois, ensinar das miñas verbas e tiraredes proveito!