Read Biblia SEPT Sabedoría 9 Bible Online

Sabedoría 9 - Biblia SEPT bible

Sabedoría 9

¹—"Deus de meus pais, Señor de misericordia que fixeches o universo coa túa Palabra

²e que na túa Sabedoría formaches o home para dominar nas túas criaturas

³e para que goberne o mundo piadosa e xustamente e administre o xuízo rectamente,

⁴concédeme a Sabedoría que asenta no trono ó teu lado e non me rexeites de entre os teus fillos;

⁵pois eu son servo teu e fillo da túa escrava, un feble ser humano, de curta vida, pequeno para entender dereito e leis.

⁶Pois mesmo se un fose o máis perfecto dos homes, faltándolle a Sabedoría non vale nada.

⁷Escollíchesme ti para rei do teu pobo e para gobernante dos teus fillos e fillas;

⁸mandáchesme edificar un templo no teu monte santo e un altar na cidade da túa morada, copia do santuario que preparaches desde o comezo.

⁹E contigo está a Sabedoría, que ben coñece as túas obras e estaba ó teu lado cando fixeches o mundo e moi ben sabe ela o que aleda os teus ollos e canto vai conforme ós teus mandados.

¹⁰Envíaa desde os sagrados ceos, mándaa desde o teu trono glorioso para que me asista nos traballos e me ensine o que sexa máis do teu agrado;

¹¹pois ela, que todo o sabe e comprende, hame guiar axeitadamente nas miñas empresas protexéndome co seu prestixio.

¹²Serán entón aceptables as miñas obras, gobernarei xustamente ó teu pobo e serei digno do trono de meu pai.

¹³Que home de feito poderá coñecer o plan de Deus ou quen se decatará do que quere o Señor?

¹⁴Abofé, os pensamentos dos mortais son covardes e inseguros os nosos proxectos.

¹⁵Porque o corpo corruptible pesa na alma e a tenda terrestre oprime a mente cavilosa.

¹⁶Se con dificultade imaxinamos o que hai sobre a terra e con traballo atopamos o que está a man, quen pescudará o que hai no ceo?

¹⁷Quen coñecerá o teu consello se ti non lle dás sabedoría mandando o teu espírito santo desde o alto?

¹⁸Soamente deste xeito se endereitaron os vieiros dos terrestres, aprenden os homes o que é do teu gusto e son salvados pola Sabedoría.