Read Biblia SEPT Eclesiástico 1 Bible Online

Eclesiástico 1 - Biblia SEPT bible

Eclesiástico 1

¹PARTE PRIMEIRA: O Libro das Máximas (1, 1-42, 14) Toda Sabedoría vén do Señor e fica onda El para sempre.

²A area dos mares, as pingas da chuvia e os días da eternidade quen poderá contalos?

³O alto do ceo, o grande da terra, o fondo do abismo quen os sondará?

⁴Antes de todo foi creada a Sabedoría, a intelixencia prudente desde a eternidade.

⁶A raiceira da Sabedoría a quen se lle revelou? E os seus planos secretos quen os coñeceu?

⁸Non hai máis ca un que sexa Sabio e moi terrible cando asenta no seu trono:

⁹O Señor! Foi El quen a creou, mirou e mediu; e esparexeuna sobre todas as súas obras,

¹⁰entre todos os seres vivos, conforme a súa xenerosidade; e déullela en agasallo ós seus amigos.

¹¹O temor do Señor é boa sona e motivo de orgullo, gozo e coroa de xúbilo.

¹²O temor do Señor dá folgos ó corazón, procúralle gozo, ledicia e vida longa.

¹³Para quen teme ó Señor todo remata ben, no día do seu pasamento será bendicido.

¹⁴O principio da Sabedoría é temer o Señor; xa no seo materno foi creado xunto cos fieis.

¹⁵Entre os homes fixo un niño, alicerce eterno, e hase manter leal a carón da súa caste.

¹⁶Plenitude da Sabedoría: temer o Señor; pois dos seus froitos embebédaos;

¹⁷énchelles todo o casal de tesouros e os piornos dos seus produtos.

¹⁸Coroa da Sabedoría é o temor do Señor que fai florecer a paz e a cura saudable.

¹⁹Fai orballar a ciencia e o coñecer intelixente e agranda a sona dos que a posúen.

²⁰A raiceira da Sabedoría é temer o Señor; e as súas pólas, a lonxevidade.

²²Quen sen razón se alporiza non sairá impune pois o pulo da paixón fará a súa ruína.

²³O paciente, con todo, mantense ata o momento oportuno, e ó remate a ledicia recompénsao.

²⁴Contén por certo tempo as súas razóns mais moitas bocas pregoarán o seu siso.

²⁵Entre os tesouros da Sabedoría atópase o modelo da prudencia, mais para o pecador a relixiosidade é de aborrecer.

²⁶Cobizas a Sabedoría? Garda os mandamentos! O Señor daracha a eito;

²⁷porque Sabedoría e instrución é o temor do Señor e quen o deleita son a sinceridade e a humildade.

²⁸Non andes con retrancas perante o temor do Señor nin te achegues a El cun corazón dobre.

²⁹Non fagas o hipócrita diante da xente e pon tino nos teus labios.

³⁰Non te exaltes, non sexa que caias e atraias a infamia; pois o Señor descubrirá os teus segredos e botaríate por terra no medio da asemblea por te achegares ó temor do Señor levando o corazón cheo de engano.