Read Biblia SEPT Eclesiástico 10 Bible Online

Eclesiástico 10 - Biblia SEPT bible

Eclesiástico 10

¹Un maxistrado público instrúe ó seu pobo e o goberno dun home asisado é ordenado.

²Como é o gobernante do pobo, así son os subalternos; e coma o rexedor, os cidadáns.

³Un rei insensato arruína a cidade pois a cidade asenta na prudencia dos xefes.

⁴Nas mans de Deus está o goberno do mundo e suscita en cada momento o home que convén.

⁵Nas mans de Deus está todo poder humano e ten en máis a súa gloria có gobernante.

⁶Non devolvas mal ó veciño por unha inxuria calquera; non te deixes ir polo camiño da soberbia.

⁷A soberbia é odiada do Señor e mais dos homes; e de entrámbolos dous, o esforzo do que asoballa.

⁸Dun pobo a outro pasa a hexemonía e razón da violencia e da soberbia.

⁹De que se gaba o po e mais a cinsa e quen, aínda de vivo, ten podres as entrañas?

¹⁰O ataque da doenza ri do médico: "Rei hoxe, defunto mañá".

¹¹Cando morre o home herdan os vermes: as lombrigas, as larvas e os insectos.

¹²O celme do orgullo está no home insolente que aparta o seu pensar do Creador;

¹³pois manancial de orgullo é o pecado e a súa fonte burbulla malicia, por iso Deus castígao terriblemente e bate nel ata esnaquizalo.

¹⁴Derruba Deus o trono dos soberbios e asenta no seu posto ós humildes.

¹⁵Deus arrinca as raiceiras das nacións e planta no seu lugar ós sinxelos.

¹⁶O Señor encobre as pegadas dos pobos e talla os seus raigaños a ras do chan,

¹⁷várreos da terra e arríncaos e borra do mundo a súa lembranza.

¹⁸Non di co home o orgullo nin a carraxe co nado de muller!

¹⁹Cal é a raza honrada? — A raza humana. Cal é a raza honrada? — A que teme a Deus. Cal é a raza desprezable? — A raza humana. Cal é a raza desprezable? — A que viola o mandado.

²⁰Entre irmáns tense respecto ó vinculeiro, mais o que teme a Deus vaille por diante.

²²Emigrante ou alleo, estranxeiro ou mendigo, a gloria deles é o temor de Deus.

²³Non é de rexeitar un pobre intelixente nin ter por honrado a calquera home pecador.

²⁴Ao príncipe, ó gobernante e ó maxistrado débenselles respecto mais ninguén é meirande có que teme a Deus.

²⁵Ao escravo sensato servirano homes libres sen que un home intelixente teña que obxectar.

²⁶Non te chufes de listo ó facer o teu traballo nin presumas no tempo da estreitura.

²⁷Máis vale un obreiro que abunda en facenda do que o presuntuoso que non ten mantenza.

²⁸Meu fillo, con modestia respéctate a ti mesmo e daráseche o alimento que che cómpre.

²⁹Quen declarará inocente a quen se di culpable? Quen vai respectar a quen se rebaixa?

³⁰Pobres hai que son respectados por mor da súa prudencia coma hai quen é honrado por causa da súa riqueza. Honrado pola riqueza? — Por canto tempo? Aldraxado pola pobreza? — Por canto tempo?

³¹Se o respectan na pobreza, canto máis na riqueza. Se o aldraxan na riqueza, canto máis na pobreza.