Read Biblia SEPT Eclesiástico 12 Bible Online

Eclesiástico 12 - Biblia SEPT bible

Eclesiástico 12

¹Se lle fas mal a quen é bo, a quen farás ben de xeito que tires proveito do beneficio teu?

²Faille ben ó xusto e terás recompensa, se non del, do Señor.

³Non hai proveito no acorrer o malvado pois nin así dará esmola;

⁴Atoparás un mal dobrado cando peor che veña por todo o ben que lle teñas feito.

⁵Non lle deas armas de guerra para que non te ataque con elas,

⁶pois Deus en persoa rexeita os malvados e volve sobre eles a vinganza.

⁷Dálle ó bo, négalle ó malvado, axuda ó humilde, non lle deas ó fachendoso.

⁸Non se recoñece un amigo na prosperidade nin disimula un inimigo na desgraza.

⁹Cando un medra, mesmo o inimigo é compadre; cando un vai mal, mesmo o veciño se afasta del.

¹⁰Endexamais non confíes no inimigo porque a súa maldade enferruxa coma o bronce;

¹¹por máis que te escoite e se porte mainiño, ti vixía e ten reparo del; fai coma se descubrises un segredo e saberás onde ía dar o seu celo.

¹²Non o poñas á túa beira para que non te chimpe e ocupe o teu posto; non o deixes asentar á túa dereita pois cobizará o teu asento; daquela comprenderías as miñas razóns e terías que xemer xunto comigo.

¹³Quen se apiada do encantador rillado ou do que se achega á fera con dentes?

¹⁴Tal sucede co que se achega a home insolente e se enguedella nas súas culpas.

¹⁵Mentres esteas de pé non deixa el ver quen é, mais se tropezas non te manterá.

¹⁶O inimigo é todo dozura nos labios mais no seu interior pensa en abismos profundos; tamén pode o inimigo ter bágoas nos ollos, mais, se atopa ocasión, non se dará farto de sangue;

¹⁷chégache unha desgraza: alí anda el, semellando apoiarte porache un tropezo;

¹⁸despois, abanea a cabeza, bate coas mans e todo é murmurar e demudar a face.