Read Biblia SEPT Eclesiástico 15 Bible Online

Eclesiástico 15 - Biblia SEPT bible

Eclesiástico 15

¹Deste xeito compórtase quen teme ó Señor pois quen se aferra á lei, acádaa.

²Sairalle ó encontro coma unha nai e acollerao coma a moza casada.

³Manterao co pan da prudencia, daralle a beber auga de sinxeleza;

⁴se se apoia nela non abaneará, afiuzará nela e non será confundido;

⁵soerguerao por riba dos seus compañeiros para darlle a palabra no medio da asemblea;

⁶Atoparase co gozo e a ledicia, ela procuraralle sona perdurable.

⁷Non se fan con ela os homes vans nin a albiscarán os fachendosos;

⁸fica lonxe dos insensatos, non se lembran dela os mentireiros.

⁹Non di ben a súa loanza na boca do perverso pois Deus non lla concedeu.

¹⁰Pola boca do Sabio exprésase a súa loanza e quen a domina, ensínaa.

¹¹Non digas: —"De Deus vén o meu pecado" pois El non fai aquilo que aborrece.

¹²Nin digas: —"Foi El quen me fixo caer" pois non ten El que ver cos pecadores.

¹³O Señor odia a maldade e a abominación e non llelas propón ós que o temen.

¹⁴Desde o comezo Deus creou ó home e deixouno á súa libre intención.

¹⁵Se ti queres, podes gardar o precepto, facer a súa vontade é sinal de intelixencia.

¹⁶Puxo diante de ti o lume e mais a auga: bota a man ó que prefiras.

¹⁷Diante de cada home están a vida e a morte: o que anhele: iso daráselle;

¹⁸pois grande é a Sabedoría do Señor, El é potente e egrexio e todo o dexerga.

¹⁹Os ollos de Deus contemplan as súas criaturas e El penetra as accións de cadaquén.

²⁰Non lle mandou ó home que pecase nin deu pé ós homes falsos.